ونىڭ ىشىندە 2017-2021 جىلدارعا ارنالعان ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ «ەڭبەك» باعدارلاماسى اياسىندا – 1 ملرد 936،3 ملن تەڭگەنىڭ 433 جوباسى قارجىلاندىرىلدى. ايتا كەتۋ كەرەك، ونىڭ ۇشتەن ءبىر بولىگى – «باستاۋ بيزنەس» باعدارلاماسى قاتىسۋشىلارىنان تۇسكەن جوبالار، ال 80 % – ستارتاپ-جوبالار بولىپ تابىلادى.
قوردان نەسيە العان ازاماتتاردىڭ ءبىرى – ماقتاارال اۋدانىنىڭ تۇرعىنى مۇرات مەيىرمانوۆ. ول بۇرىننان جيھاز شىعارۋمەن اينالىساتىن، ءبىراق مەملەكەتتىڭ قولداۋىن پايدالانباعان. وتكەن جىلى جەكە كاسىپكەر رەتىندە تىركەلىپ، 2018 جىلدىڭ باسىندا 4 ميلليون تەڭگە نەسيە العان. قاراجاتتى قۇرال-جابدىقتار مەن ماتەريالداردى ساتىپ الۋعا جۇمسادى. سەحتە وتباسى مۇشەلەرىمەن قاتار تاعى جەتى ادام جۇمىس ىستەيدى. ماتەريالدار شىمكەنتتەن اكەلىنىپ، دايىن تاۋارلار جەكە دۇكەندە ساتىلادى. تۇسكەن تابىس بيزنەستى ءارى-قاراي دامىتۋعا جانە نەسيەنى وتەۋگە جەتكىلىكتى بولىپ تۇر، دەيدى كاسىپ يگەسى.
بۇگىنگى تاڭدا «اۋىل شارۋاشىلىعىن قارجىلاي قولداۋ قورى» اق كەلەسى باعىتتار بويىنشا نەسيەلەۋدى جۇرگىزەدى: «يگىلىك» – مال مەن قۇستى ۇستاۋ جانە كوبەيتۋ، «بىرلىك» — ءسۇت قابىلداۋ بەكەتتەر جۇيەسىن قۇرۋ جانە دامىتۋ، «كاسىپكەر» — اۋىلشارۋاشىلىق جانە اۋىلشارۋاشىلىق ەمەس بيزنەس تۇرلەرىن دامىتۋ، «ىرىس» – 50-10 ءىقم باسىنا ارنالعان تاۋارلى ءسۇت فەرمالارىن قۇرۋ جانە دامىتۋ، «ەگىنجاي» – كوكتەمگى ەگىس جانە كۇزگى جيىن-تەرىم جۇمىستارىن قارجىلاندىرۋ.
بيىل مال باسىن كوبەيتۋ جانە ءىرى قارا مال ەتىن ەكسپورتتاۋ كولەمدەرىن ارتتىرۋ ءۇشىن قور جاڭارتىلعان «سىباعا» باعدارلاماسىن ەنگىزدى. بۇل باعىتتاعى قارجى ءىرى قارا جانە ۇساق ءمۇيىزدى انالىق مال باسىن ساتىپ الۋعا جۇمسالادى.
«سىباعا» بويىنشا وبلىستىق فيليال تاراپىنان 565 ملن تەڭگەگە 36 جوبا ماقۇلدانعان، — دەيدى قوردىڭ وبلىستىق فيليالىنىڭ ديرەكتورى عالىمجان نۇرلىبايەۆ. – بۇل قارجىعا جەرگىلىكتى ۇساق ءمۇيىزدى مال مەن شەتەلدەن ەتتى باعىتتاعى سيىرلار ساتىپ الىنۋدا. وبلىس بويىنشا جىلدىڭ سوڭىنا دەيىن مىڭنان استام ءىرى قارا اكەلىنەدى.
جالپى، بارلىق باعىتتار بويىنشا ەڭ جوعارى كاسىپكەرلىك بەلسەندىلىكتى سارىاعاش اۋدانىنىڭ تۇرعىندارى كورسەتۋدە. بۇل اۋدان بويىنشا 365 ملن تەڭگەگە 59 جوبا قارجىلاندىرىلدى. سونداي-اق، كوشباسشىلار قاتارىندا – ورداباسى، سايرام، تولەبي اۋداندارىنىڭ كاسىپكەرلەرى بار.
اۋىلدىق كاسىپكەرلىكتى قارجىلاندىرۋ قوردىڭ ءوز قارجىسى مەن «ەڭبەك» باعدارلاماسىنىڭ ەكىنشى ترانش اياسىنداعى قارجى ارقىلى جالعاسۋدا.
