Búgin Túrkistanda «Aýyl – mádeniettiń bastaýy» atty oblystyq baiqaýy bastaldy. Túrkistan oblystyq mádeniet jáne halyq shyǵarmashylyǵy ortalyǵynyń uiymdastyrýymen ótip jatqan baiqaýǵa jalpy 200-ge tarta aýyldyq mádeniet úileri men klýbtar qatysýda, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Alǵashqy bolyp Saryaǵash aýdandyq mádeniet úiine qarasty 16 ujym óz jumysyn qorǵap jatyr. Atalǵan shara halyqqa zamanaýi mádeni qyzmet kórsetý sharalaryn jaqsartýǵa, mádeniet mekemeleriniń jumys sapasyn arttyrý men halyq shyǵarmashylyǵyn damytýǵa jáne aýyldyq mádeniet mekemeleriniń jumysyna qoldaý kórsetýge baǵyttalǵan.
Baiqaýǵa Túrkistan oblysyndaǵy mádeniet jáne halyq shyǵarmashylyǵy ortalyǵynyń direktory, QR Mádeniet salasynyń úzdigi Meiirjan Aliakbarov pen osy ortalyqtyń «Mádeni-demalys jumystaryn uiymdastyrý» bóliminiń jetekshisi Murat Jumanov pen mádeni uiymdastyrýshy mamany, QR Mádeniet salasynyń úzdigi Zaǵipa Ómirzaqova qazylyq etedi. Baiqaýdyń talaptary men sharttaryna sáikes qazylar alqasy aýyldyq mádeniet úileri men klýbtardyń jumysyn jaqsartýǵa bailanysty barlyq múmkindikke baǵa beredi.
Aita keteiik, baiqaý «Kongress Holl» kópsalaly kesheniniń konferentsiia zalynda jalǵasady. Onda kúndelikti ár aýdannan kelgen qatysýshylar 40 betten turatyn 5 minýttyq tanystyrylym júrgizedi. Jeńimpazdarǵa bas júlde, I, II, III dárejeli júlde qorlary jáne arnaiy júldeler tabystalady.
