Túrkistan oblysynyń ákimi Nuralhan Kósherov Túrkistan qalasynda salynyp jatqan «Ana men bala» ortalyǵyndaǵy jumystarmen tanysty,- dep habarlaıdy Dalanews.kz
Birikken Arab Ámirlikteriniń «Abý-Dabı» qorynyń demeýshiligimen salynyp jatqan perzenthana – 80 tósek-oryndyq. «Túrkistan» korporatıvtik áleýmettik damý qorynyń tapsyrysymen qurylys jumystaryn «Erıstaıl-Kazahstan» JSHS júrgizip jatyr.
Ortalyq 3,3 gektar aýmaqta ornalasady. Ǵımarat eki qabatty, jalpy aýdany – 17 288 sharshy metr. Qazirgi tańda jer qazý jumystary tolyq aıaqtalǵan. İrgetasyn quıý jáne qaıta topyraqpen kómý jumystary atqarylǵan. Nysan 2026 jyly tapsyrylady dep josparlanǵan.
Oblys ákimi merdiger men jaýapty basqarma basshylaryna jumysty sapaly atqarý, qurylys talaptaryn qatań saqtaýdy tapsyrdy. Qurylysqa qatysty usynys-pikirlerdi tyńdap, medısınalyq mekemeni mamandarmen qamtý, jumysyn úılestirý máselesi de nazardan túspeýi tıis ekenin eskertti.
