Búgin, 15 naýryzǵa «Naýryz – ulttyq dástúr men meımandostyq merekesi» dep aıdar taǵylyp, barlyq aýdan, qalada ákimdikteri men memlekettik mekeme qyzmetkerleri jumysqa qazaqtyń ulttyq kıimin kıip keldi.
Ulttyq bolmysymyzdy, mádenıetimiz ben kıimimizdi dáripteýge arnalǵan bastamany Túrkistan oblysynyń ákimi Darhan Satybaldy bastap berdi. Áriptesterin kele jatqan Naýryz merekesimen quttyqtaǵan óńir basshysy oblys ákimi apparatynyń kezekti otyrysyn ótkizdi.
– Sizderdi ulttyq kıimde kórip kóńilim kóterilip ketti. Ulttyq kıim memlekettik qyzmetshiniń bolmysyn erekshe etip kórsetedi. Mádenıetimiz ben dástúrimizdi qoldaǵan jón. Naýryz jaqsylyǵymen kelip, halqymyzdyń berekesi arta bersin, – degen Darhan Satybaldy kún tártibindegi máselelerdi talqylap, tapsyrmalar berdi.
Oblystyq basqarma basshylary men qyzmetkerleri, aýdan, qala ákimderi men ákimdik ujymdary da jumysqa ulttyq kıimmen kelip, bastamaǵa qoldaý kórsetti. Túrkistan óńiriniń memlekettik qyzmetshileri aldaǵy ýaqytta da ulttyq kıim kıýdi dástúrge aınaldyrýdy kózdep otyr.
