Memleket basshysynyń tapsyrmasyna sáıkes, aǵymdaǵy jyly Qazaqstan Respýblıkasy «Sý resýrstaryn basqarý júıesin damytýdyń 2024–2030 jyldarǵa arnalǵan tujyrymdamasy» qabyldandy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Búgingi tańda, oblysta 50 myń gektarǵa sý únemdeý tehnologıalary ornalastyryldy. Cý únemdeý tehnologıalary óndirisin damytý maqsatynda jergilikti 3 kásiporyn iske qosyldy. Kásiporyndardyń jyldyq qýattylyǵy 73,0 myń gektar alqapty qamtıdy. Oblysta 552 myń gektar sýarmaly jer bar, bul Respýblıkalyq kórsetkishtiń tórtten bir bóligi.
Osy turǵyda, óńirde sý nysandary ınfraqurylymyn damytý búgingi kúnniń eń ózekti máselesi bolyp tabylady. Oblysta uzyndyǵy 12 731 shaqyrymdy quraıtyn 4180 kanal, 42 sý qoımalary, 1 256 qashyrtqy, 1 794 uńǵyma bar. Sý nysandaryn salý, qalpyna keltirý jumystaryn jedeldetý úshin, oblystyq «Turan sý» komýnaldyq mekemesiniń áleýetin tıimdi paıdalaný qolǵa alyndy. Mekeme tarapynan, oblystyq menshiktegi qashyrtqylardy mehanıkalyq tazalaý nátıjesinde tozý kórsetkishi 80 %-dan 10 %-ǵa tómendedi.
Aǵymdaǵy jyly oblystyq búdjetten 9 sý nysanyn kúrdeli jóndeýge, 6 sý nysanyn mehanıkalyq tazalaýǵa qarjy bólindi. Nátıjesinde 42,4 myń ga sýarmaly jerlerdiń melıoratıvtik jaǵdaıy jáne aǵyn sýmen qamtamasyz etilýi jaqsaratyn bolady. Oblys ákiminiń tikeleı qoldaýymen «Turan sý» mekemesin tehnıkalyq jaraqtandyrýǵa asa basymdylyq berilgen.
2023 – 2024 j.j. mekeme tabysy esebinen 60 birlik arnaıy tehnıkalar bólip tóleý negizinde satyp alyndy. Mekeme tarapynan aýdan, qala ákimdikterine, kanaldar men aryqtardy tazalaý maqsatynda, quny 756,4 mln. teńgege 14 dana ekskavator keıinnen satyp alý tártibimen jalǵa berildi. Nátıjesinde 714 shq. kanaldar, 387 shq. qashyrtqylar tazalanýda. Búgingi merekede aýdan, qala ákimdikterine qosymsha 10 dana arnaıy tehnıkalar tabystaldy.
Aıta keteıik, búgin Túrkistan qalasynda aýyl sharýashylyǵy qyzmetkerleri kúnine oraı, «AGROFEST TÚRKISTAN - 2024» saltanatty sharasy ótip jatyr. Bul kúni turǵyndarǵa ala jazdaı rızyq-nesibesin jerden tergen óńir dıqandarynyń 3000 tonnadan astam ónimderi usynyldy. «Kerýen saraı» týrısik kesheninde uıymdastyrylǵan merekelik sharada asyl tuqymdy mal sharýashylyǵy men tehnıkalar kórmesi jáne aýyl sharýashylyǵy ónimderiniń jármeńkesi jáne Ulttyq sport túrlerinen jarystar ótýde.
