Kógaldandyrý jumystary toqtaýsyz jalǵasyp jatyr. Túrkistanda jergilikti klımatqa tez beıimdeletin kóshetter men kópjyldyq shópter, gúlder gúldeıtin shópterdi ósirýge mán berilgen. Atap aıtqanda, shaharda kóleńke beretin ári tez ósetin qaraǵaı men akasıa aǵashtary, úlkenjapyraqty shegirshin, úıeńki otyrǵyzyldy.
Túrkistan qalasynyń «Jasyl beldeýinde» jemis aǵashtary da ósirilýde. Bul jumystarǵa agronomdar, mamandar, kásipkerler, qala turǵyndary atsalysýda. Osy rette qalany 32 sektorǵa bólip, aýdan, qala ákimdikteri men basqarmalardy jaýapty etip, jumysty júıeleý óz jemisin berý ústinde. Oblys ákimi Ómirzaq Shókeev ár sektordy aralap, qalanyń abattandyrý jáne kógaldandyrý jumystaryn turaqty túrde tekserip turady. Barlyq sektorda jumys qarqyny joǵary. Qala kún saıyn qoqystan tazartylyp, gúlzarlar, saıabaqtar jaınaı túsken.
Aıaqjoldar men velojoldar, sýburqaqtar elge qyzmet etýde.
Qala aýmaǵyndaǵy jasyl aýmaqtarǵa sý júıesi júrgizilip, turaqty túrde sýarylyp jatyr. Jasyl jelekterdi kúndelikti sýarý úshin qala aýmaǵyna gıdranttyq júıe júrgizilgen. Búginde 32 sektorda úsh kezeńmen jumys júrgizilip, 1600 ga jerge 60 myńnan astam kóshet egilgen. Qalada senbilikter ótkizý, turǵyndardyń ekologıalyq saýattylyǵyn arttyrý baǵytyndaǵy is-sharalar dástúrge aınalǵan. Sektor jumysyna jaýapy azamattyń biri, Otyrar aýdany Talapty aýyl okrýgi ákimi apparatynyń qyzmetkeri Dáýren Partaev Túrkistandy túletýge úles qosyp júrgenine qýanyshty.
«Oblys ákimi Ómirzaq Estaıulynyń tapsyrmasy boıynsha, Otyrar aýdany ákimdigi jaýapty sektordaǵy Qulynshaq aqyn kóshesiniń tazalyq, kóriktendirý, kógaldandyrý jumystarymen aınalasyp jatyrmyz. Keremet ózgeristerdi kórdik. Qalanyń bolashaǵy jarqyn», – deıdi otanshyl azamat.
«Jasyl beldeýge» taǵy da baryp, baqylaýdan ótkizgen Ómirzaq Estaıuly egilgen kóshetterdiń ýaqtyly sýǵarylýyna asa mán berilýi kerektigin, sonda ǵana is nátıje beretinin aıtty. Urpaq úshin paıdaly bul bastama úzdiksiz júzege asyryla beretinin jetkizip, azamattarǵa jumysty janashyrlyqpen, sergektikpen atqarýdy tapsyrdy.
Shahardaǵy jaǵymdy ózgeristerdi Túrkistan qalasynyń turǵyny Áshim Aldabergenov joǵary baǵalaıdy.
«Burynǵyǵa qaraǵanda bul jerde kóp ózgeris bolyp jatyr. Kógaldandyrý, tazalyq, abattandyrý jumystary óte jaqsy. Oblys bolǵaly osyndaı jaqsylyqtarǵa kýá bolýdamyz. Buryn bul «Jasyl beldeý» men jańa shaǵynaýdannyń orny dala-tuǵyn. Dalany kórkeıtip, jaǵdaı jasap jatqan úkimetke rahmet», – deıdi turǵyn.
Túrkistannyń týmasy, qala parıoty Baıan Buldyryqova «Qazir týrıser de kóp kelip jatyr. Onyń bári adamdy qýantady. Memleket basshylyǵyna, ákimshilikke rızashylyǵymdy bildiremin. Qazir qalada mádenıet joǵarylap keledi. Kógaldandyrý, abattandyrý jumystary arqyly Túrkistannyń ekologıasy jaqsara túsetinine senimdimin», – deıdi.
Aıta keteıik, bıyl QR Úkimeti Túrkistan oblysyn áleýmettik-ekonomıkalyq damytýdyń 2021-2025 jyldarǵa arnalǵan keshendi josparyn maquldady. Túrkistan qalasyn damytýdyń 1-kezeńi aıaqtalyp, negizgi áleýmettik ınfraqurylymy qalandy. 123 nysannyń qurylysy aıaqtaldy. Túrkistan qalasyn damytýdyń İİ kezeńi aıasynda 109 joba iske asyrylady. Bul maqsatqa 1,3 trln teńge ınvestısıa baǵyttalady. Bul qoldaý men josparlar Túrkistandy Orta Azıadaǵy eń kórikti shaharlardyń birine aınaldyrýǵa serpin beretini sózsiz.
Ásirese, abattandyrý, kógaldandyrý jumystary qarqyndy. Jan jadyratar jańalyqtar men kóz qýantatyn ózgeristerdi el qazirdiń ózinde sezip-bilip otyr. Túrkistandy damytý baǵytyndaǵy jumystar jalǵasa beredi.
