Delegatsiia quramyn óńirimizdiń saýda-ekonomikalyq, investitsiialyq, agrarlyq, sonymen qatar, týrizm salalaryndaǵy joǵary áleýetimen tanystyrǵan oblys ákiminiń birinshi orynbasary Q.Núkenov baýyrlas túrik elimen kez kelgen salada áriptestik ornatýǵa nietti ekenin jetkizdi.
Óz kezeginde, sóz alǵan «Biotrend energy» kompaniiasynyń basqarma tóraǵasy M.Aslan kompaniianyń aýyl sharýashylyǵy ónimderin qaita óńdeýde ozyq kásiporyn ekenin aityp, osy salada Túrkistan oblysyna investitsiia salýǵa nietti ekenin jetkizdi. Atap aitqanda, tóraǵa maqta qaldyqtary men qoqystan polietilen ónimderin, elektr qýatyn jáne tabiǵi gaz shyǵarýǵa bolatynyn aityp, naqtyraq aitqanda, maqta qaldyqtarynan elektr qýatyn óndiretin zaýyt salý týraly usynysyn jetkizdi.
Túrkiialyq investorlardyń málimetinshe, 1 gektar maqta alqabynan 3 tonna maqta qaldyǵy shyqsa, odan 30-40 mVt elektr qýatyn óndirýge bolady eken. Osyny eskergen mamandar "aq altyn" egiletin Shardara, Jetisai jáne Maqtaaral aýdandarynda maqta qaldyǵyn qabyldap, ony óńdeitin eki zaýyt salýdy josparlap otyr. Bul rette, delegatsiia jetekshisi ákimdik tarapynan jer telimin bólip berý men qujattardy rásimdeý jaǵynan qajetti qoldaý kórsetýdi surady.
Barsha málimetterge qanyqqan oblys ákiminiń birinshi orynbasary investorlarǵa ákimdik tarapynan tiisti qoldaýlardyń kórsetiletinin jetkizdi. Jer telimin berýde máseleniń joqtyǵyn alǵa tartqan Q.Núkenov salyq tóleý turǵysynan da jeńildikterdiń bolatynyn jetkizdi.
Aita keteiik, «Biotrend energy» kompaniiasy halyqaralyq standarttarǵa sáikes taza qýat óndirýdi maqsat tutqan, irgetasy 2012 jyly qurylǵan energetikalyq kásiporyn. Onda búginde 200-den astam bilikti qyzmetkerler jumys isteidi.
Túrkistan oblysy ákiminiń baspasóz qyzmeti
