دەلەگاسيا قۇرامىن ءوڭىرىمىزدىڭ ساۋدا-ەكونوميكالىق، ينۆەستيسيالىق، اگرارلىق، سونىمەن قاتار، تۋريزم سالالارىنداعى جوعارى الەۋەتىمەن تانىستىرعان وبلىس اكىمىنىڭ ءبىرىنشى ورىنباسارى ق.نۇكەنوۆ باۋىرلاس تۇرىك ەلىمەن كەز كەلگەن سالادا ارىپتەستىك ورناتۋعا نيەتتى ەكەنىن جەتكىزدى.
– بىزدەر، بۇگىندە، تۇركىستاننىڭ جاڭعىرىپ، جاڭارىپ جاتقان داۋىرىندە تۇرمىز. وسى ورايدا، تۇركى تىلدەس ەلدەر مەن ورتالىق ازيانىڭ رۋحاني-مادەني ورتالىعى بولىپ تابىلاتىن شاھارىمىزدى دامىتۋدا باۋىرلاس تۇرىك اعايىندارمەن ەكى جاقتى ءتيىمدى ونەركاسىپتىك، ساۋدا-ەكونوميكالىق جانە ينۆەستيسيالىق ارىپتەستىك ورناتۋ مىندەتى تۇر دەپ بىلەمىن. اسىرەسە، تابيعاتى كورىكتى ءھام دەنساۋلىققا پايدالى ورىندارعا باي وبلىسىمىزدىڭ تۋريزم سالاسىن كوتەرۋ ماقساتىندا وزدەرىڭىزدەن جاقسى ۇسىنىستار كۇتەمىز. جانە ولاردى قاشان دا قولداۋعا ءازىرمىز، – دەدى ق.نۇكەنوۆ.
ءوز كەزەگىندە، ءسوز العان «Biotrend energy» كومپانياسىنىڭ باسقارما ءتوراعاسى م.اسلان كومپانيانىڭ اۋىل شارۋاشىلىعى ونىمدەرىن قايتا وڭدەۋدە وزىق كاسىپورىن ەكەنىن ايتىپ، وسى سالادا تۇركىستان وبلىسىنا ينۆەستيسيا سالۋعا نيەتتى ەكەنىن جەتكىزدى. اتاپ ايتقاندا، ءتوراعا ماقتا قالدىقتارى مەن قوقىستان پوليەتيلەن ونىمدەرىن، ەلەكتر قۋاتىن جانە تابيعي گاز شىعارۋعا بولاتىنىن ايتىپ، ناقتىراق ايتقاندا، ماقتا قالدىقتارىنان ەلەكتر قۋاتىن وندىرەتىن زاۋىت سالۋ تۋرالى ۇسىنىسىن جەتكىزدى.
تۇركيالىق ينۆەستورلاردىڭ مالىمەتىنشە، 1 گەكتار ماقتا القابىنان 3 توننا ماقتا قالدىعى شىقسا، ودان 30-40 مۆت ەلەكتر قۋاتىن وندىرۋگە بولادى ەكەن. وسىنى ەسكەرگەن ماماندار "اق التىن" ەگىلەتىن شاردارا، جەتىساي جانە ماقتاارال اۋداندارىندا ماقتا قالدىعىن قابىلداپ، ونى وڭدەيتىن ەكى زاۋىت سالۋدى جوسپارلاپ وتىر. بۇل رەتتە، دەلەگاسيا جەتەكشىسى اكىمدىك تاراپىنان جەر تەلىمىن ءبولىپ بەرۋ مەن قۇجاتتاردى راسىمدەۋ جاعىنان قاجەتتى قولداۋ كورسەتۋدى سۇرادى.
بارشا مالىمەتتەرگە قانىققان وبلىس اكىمىنىڭ ءبىرىنشى ورىنباسارى ينۆەستورلارعا اكىمدىك تاراپىنان ءتيىستى قولداۋلاردىڭ كورسەتىلەتىنىن جەتكىزدى. جەر تەلىمىن بەرۋدە ماسەلەنىڭ جوقتىعىن العا تارتقان ق.نۇكەنوۆ سالىق تولەۋ تۇرعىسىنان دا جەڭىلدىكتەردىڭ بولاتىنىن جەتكىزدى.
ايتا كەتەيىك، «Biotrend energy» كومپانياسى حالىقارالىق ستاندارتتارعا سايكەس تازا قۋات ءوندىرۋدى ماقسات تۇتقان، ىرگەتاسى 2012 جىلى قۇرىلعان ەنەرگەتيكالىق كاسىپورىن. وندا بۇگىندە 200-دەن استام بىلىكتى قىزمەتكەرلەر جۇمىس ىستەيدى.
تۇركىستان وبلىسى اكىمىنىڭ باسپا ءسوز قىزمەتى
