«Azatlyk» radiosynyń jýrnalisteri Ashhabadta Didar Hitrovskii degen atpen tanylǵan tiktoker Didar Amansahatovtyń qabirin tapty. Ol 2025 jyldyń sońynda et baǵasynyń qoljetimsizdigi týraly video jariialaǵannan keiin joǵalyp ketken edi. Birneshe kúnnen soń jeli qoldanýshylary Didardy politsiia alyp ketkennen keiin qaitys bolǵanyn jaza bastaǵan. Endi bul aqparat resmi túrde rastaldy, dep habarlaidy Dalanews.kz.
Qulpytasqa qashalǵan derekke sáikes, Didar Amansahatov 1991 jylǵy 30 mamyrda týǵan, 2025 jylǵy 20 qarashada qaitys bolǵan. 34 jastaǵy er adamnyń sońǵy jariia sózderi Túrikmenstandaǵy et baǵasynyń shekten tys qymbattaýyna arnalǵan.
Ol videoda muny ázil aralas «eskertý» túrinde jetkizgen:
«Bul ne degen sumdyq — et 150 manat, 140 manat bolyp tur? Á?! Nemese sizder (úkimet) et baǵasyn túsiresizder, nemese biz múlde et jemeimiz».
Osy jazbadan keiin Hitrovskii (laqap aty Ashhabadtaǵy Hitrovka aýdanynan shyqqan bolýy múmkin) iz-túzsiz joǵaldy. Túrikmen TikTok segmentinde keibir qoldanýshylar Didar osy sózi úshin 15 táýlikke qamalǵanyn jazdy. Kóp uzamai onyń qaitys bolǵany týraly habarlar tarai bastady, alaida ólimniń sebebi ashyq aitylmady. Kópshilik tek «úkimetke qarsy shyǵýǵa bolmaidy» degen tuspalmen shektelgen.
Amansahatovtyń qaza tapqany ras bolyp shyqty. «Azatlyk» tilshileri blogerdiń qabirin tapqanyn habarlady. Onyń naqty qai ziratta jerlengeni kórsetilmeidi. Alaida TikTok jelisindegi pikirlerde Didardyń Giokdepe eldi mekeninde jerlengeni jazylǵan.
«Azatlyk» jýrnalisteri birneshe anonim derekkózben sóilesken. Solardyń biri onyń Ulttyq qaýipsizdik ministrligine tergeýge shaqyrylǵanyn aitqan. Buǵan sebep - blogerdiń qaza bolýy múmkin ekeni týraly jazba astyna qaldyrǵan kóńil aitý pikiri.
Derekkózdiń aitýynsha, tergeý kezinde ministrlik qyzmetkeri oǵan qoqan-loqy kórsetip, «basyn shapqannan keiin ómir súrýge múmkindik beretin ekinshi basyń bar ma?» dep qorqytqan.
Didar Amansahatov saiasi belsendi nemese kásibi bloger bolǵan joq. Ol TikTok-ta turmystyq taqyryptardy qozǵap, túrikmen shoý-biznes ókilderiniń áreketterin talqylap, keide ádeii oǵash ári arandatýshy málimdemeler jasaityn. Kópshilik onyń paraqshasyn oiyn-saýyq kontenti retinde qabyldaǵan.
Alaida Túrikmenstannyń arnaiy qyzmetteri Didardyń jazbalaryn «beikúná» dep baǵalamaǵan. Oǵan bilikti ashyq synaityn belsendilerge, jýrnalister men oppozitsiialyq tulǵalarǵa qoldanylatyn qatigez ádis paidalanylǵan.
