Osyǵan deiin turǵyndar aýyldyń problemalaryn úshbý hatqa jazyp, Muǵaljar aýdany boiynsha belgilengen qoǵamdyq kómekshi arqyly oblys ákimine berip jibergen. Shalǵaidaǵy aýyldan jetken hatty oqyǵan soń, Berdibek Saparbaev jaǵdaidy óz kózimen baryp kórmek maqsatta Muǵaljarǵa kelgenin aitty. Óńirdiń birinshi basshysymen kózbe kóz tildesý múmkin bolǵany úshin aýyldyqtar rizashylyq bildirdi.
Muǵaljarlyqtar oblys ákimimen kezdeskende joǵyn túgendedi. Aýyl klýbtyń joqtyǵy da úlken másele. Muny estigen «Kóktas» kompaniiasynyń basshylyǵy oblys ákiminiń aldynda burynǵy jataqhanany memlekettik-jeke menshik áriptestik negizinde klýb etip jóndeýge ýáde berdi.
— Eń birinshi, aýyz sý máselesi. Maǵan ákimderińiz biraz bóliginde aýyldyń sýdyń baryn, birazynda sý joq ekenin aitty. Degenmen, jasalǵan qujattary bar eken. 287 million teńge. Ony endi kóremiz. Biyl bolmasa, bul sharýa kelesi jyly bitýi tiis. Al gaz máselesi kúrdelirek. «Qazaq TransGazAimaq» kompaniiasynyń baǵdarlamasyna engizemiz. Aldaǵy eki jylda gaz qubyryn tartýmen ainalysatyn bolamyz. Astanadan Astana, Arqalyq, Yrǵyz, Shalqar, Muǵaljar, odan ári qarai Baiǵaninniń ústimenen Aqtaýǵa ótip ketetin jol salynyp jatyr. Sol jol myna sizderdiń aýyldaryńyzdyń ústimen ótedi. Sizderdiń Embige qarai shyǵatyn jol máselelerińiz sonda sheshiledi. Endi tek jalqaýlyqqa boi aldyrmai, eńbektený kerek, — dedi oblys ákimi Berdibek Saparbaev.
Oblys ákiminiń jaýabyna razy bolǵan aýyl turǵyndary ózderiniń jalqaýlyqtaryn moiyndady.
— Meniń osy aýyldyń baiyrǵy turǵynymyn. Bizdiń aýylda sharýa qojalyqtaryn ashyp otyrǵan azamattar bar. Ónimin satqysy keledi. Mai-qaimaǵyn, shubat-qymyzyn, qurt-irimshigin, maldyń etin satýǵa bolatyn shaǵyn bazar jasap alǵymyz keledi. Sony birneshe ret aýyl ákimine aityp júrmiz. Siz jańa óte durys aittyńyz. Biz jalqaý bolyp kettik. Bizge shópti bireý shaýyp ákelip berýi kerek. Ony bireý túsirip berýi kerek. Kórshi kelip bir jarty araqqa úiip berýi kerek. Eńbektený degen qazir joq bizde, — dedi aýyl turǵyny Qýandyq Ájiǵulov.
Janna ERALINA.
Derekkózi: aktobenews.kz
