مۇعالجار اۋىلىنىڭ ەڭ وزەكتى ماسەلەلەرى — گاز، سۋ جانە جول. جاڭاجول كەنىشىندە جاڭا نىساندى ىسكە قوسقاننان كەيىن مۇعالجار اۋىلىنا ات باسىن بۇرعان ءوڭىر باسشىسى بەردىبەك ساپاربايەۆقا تۇرعىندار مۇڭىن شاقتى.

وسىعان دەيىن تۇرعىندار اۋىلدىڭ پروبلەمالارىن ءۇشبۋ حاتقا جازىپ، مۇعالجار اۋدانى بويىنشا بەلگىلەنگەن قوعامدىق كومەكشى ارقىلى وبلىس اكىمىنە بەرىپ جىبەرگەن. شالعايداعى اۋىلدان جەتكەن حاتتى وقىعان سوڭ، بەردىبەك ساپاربايەۆ جاعدايدى ءوز كوزىمەن بارىپ كورمەك ماقساتتا مۇعالجارعا كەلگەنىن ايتتى. ءوڭىردىڭ ءبىرىنشى باسشىسىمەن كوزبە كوز تىلدەسۋ مۇمكىن بولعانى ءۇشىن اۋىلدىقتار ريزاشىلىق ءبىلدىردى.

ءوڭىر باسشىسى الدىمەن 40 جىلدان استام ۋاقىتتان بەرى قيىرشىق تاس وندىرەتىن «كوكتاس» اكسيونەرلىك قوعامىندا، كەيىن «بالاپان» باعدارلاماسى اياسىندا اشىلعان 90 ورىندىق «بوبەكجاي» بالاباقشاسىندا بولدى.

مۇعالجارلىقتار وبلىس اكىمىمەن كەزدەسكەندە جوعىن تۇگەندەدى. اۋىل كلۋبتىڭ جوقتىعى دا ۇلكەن ماسەلە. مۇنى ەستىگەن «كوكتاس» كومپانياسىنىڭ باسشىلىعى وبلىس اكىمىنىڭ الدىندا بۇرىنعى جاتاقحانانى مەملەكەتتىك-جەكە مەنشىك ارىپتەستىك نەگىزىندە كلۋب ەتىپ جوندەۋگە ۋادە بەردى.

— ەڭ ءبىرىنشى، اۋىز سۋ ماسەلەسى. ماعان اكىمدەرىڭىز ءبىراز بولىگىندە اۋىلدىڭ سۋدىڭ بارىن، ءبىرازىندا سۋ جوق ەكەنىن ايتتى. دەگەنمەن، جاسالعان قۇجاتتارى بار ەكەن. 287 ميلليون تەڭگە. ونى ەندى كورەمىز. بيىل بولماسا، بۇل شارۋا كەلەسى جىلى ءبىتۋى ءتيىس. ال گاز ماسەلەسى كۇردەلىرەك. «قازاق ترانسگازايماق» كومپانياسىنىڭ باعدارلاماسىنا ەنگىزەمىز. الداعى ەكى جىلدا گاز قۇبىرىن تارتۋمەن اينالىساتىن بولامىز. استانادان استانا، ارقالىق، ىرعىز، شالقار، مۇعالجار، ودان ءارى قاراي ءبايعانيننىڭ ۇستىمەنەن اقتاۋعا ءوتىپ كەتەتىن جول سالىنىپ جاتىر. سول جول مىنا سىزدەردىڭ اۋىلدارىڭىزدىڭ ۇستىمەن وتەدى. سىزدەردىڭ ەمبىگە قاراي شىعاتىن جول ماسەلەلەرىڭىز سوندا شەشىلەدى. ەندى تەك  جالقاۋلىققا بوي الدىرماي، ەڭبەكتەنۋ كەرەك، — دەدى وبلىس اكىمى بەردىبەك ساپاربايەۆ.

وبلىس اكىمىنىڭ جاۋابىنا رازى بولعان اۋىل تۇرعىندارى وزدەرىنىڭ جالقاۋلىقتارىن مويىندادى.

— مەنىڭ وسى اۋىلدىڭ بايىرعى تۇرعىنىمىن. ءبىزدىڭ اۋىلدا شارۋا قوجالىقتارىن اشىپ وتىرعان ازاماتتار بار. ءونىمىن ساتقىسى كەلەدى. ماي-قايماعىن، شۇبات-قىمىزىن، قۇرت-ىرىمشىگىن، مالدىڭ ەتىن ساتۋعا بولاتىن شاعىن بازار جاساپ العىمىز كەلەدى. سونى بىرنەشە رەت اۋىل اكىمىنە ايتىپ ءجۇرمىز. ءسىز جاڭا وتە دۇرىس ايتتىڭىز. ءبىز جالقاۋ بولىپ كەتتىك. بىزگە ءشوپتى بىرەۋ شاۋىپ اكەلىپ بەرۋى كەرەك. ونى بىرەۋ ءتۇسىرىپ بەرۋى كەرەك. كورشى كەلىپ ءبىر جارتى اراققا ءۇيىپ بەرۋى كەرەك. ەڭبەكتەنۋ دەگەن ءقازىر جوق بىزدە، — دەدى اۋىل تۇرعىنى قۋاندىق ءاجىعۇلوۆ.

 

جاننا ەرالينا.

دەرەككوزى: aktobenews.kz