Ishki ister ministriniń eks-basshysy Erlan Turǵymbaevqa qatysty qylmystyq is qozǵalǵany rastaldy, - dep habarlaidy Dalanews.kz.
Bul aqparatty qazirgi Ishki ister ministrliginiń basshysy Erjan Sádenov rastady.
«Bul isti Ishki ister ministrligi tergep jatqan joq. Sondyqtan qandai is, qandai bap boiynsha is júrip jatqanyna pikir bildire almaimyn», - deidi Sádenov Májilis kýlýarynda.
Buǵan deiin birneshe BAQ burynǵy ishki ister ministri Turǵymbaevqa qatysty qylmystyq is qozǵalǵanyn habarlaǵan bolatyn. Derekterge súiensek, oǵan qatysty 361-baptyń 1-bólimi ("laýazymdyq ókilettikterdi teris paidalaný") boiynsha is qozǵalǵan, iaǵni Qańtar oqiǵasy kezinde qyzmettik ókiletin asyra paidalandy dep aiyptalyp otyr eken.
orda.kz málimetinshe, tergeý nysanynda burynǵy ishki ister ministrinen bólek Taldyqorǵan politsiiasynyń burynǵy bastyǵy Asqar Nursapa, Qarasai aýdanynyń burynǵy politsiia bastyǵy Bolat Totybaev jáne basqalary bar.
Erlan Turǵymbaev 2012 jyldan beri ishki ister ministriniń orynbasary, 2019 jyldan beri ishki ister ministri qyzmetterin atqardy.
Al 2022 jyly onyń qyzmetten ketkeni belgili boldy.
Aita keteiik, buǵan deiin de burynǵy ishki ister ministri Erlan Turǵymbaev qańtardaǵy tártipsizdik boiynsha kúdikti ekeni týraly aqparat tarady. Biraq ol kezde QR Bas prokýratýrasy muny rastamady.
"Burynǵy ishki ister ministri Erlan Turǵymbaev kúdikti emes. Ol Bas prokýratýranyń vedomstvoaralyq tergeý jáne jedel toby tergep jatqan qylmystyq iske kýáger retinde jaýap berdi", - dep habarlanǵan edi sol kezde.
