Óz kezeginde QR Ishki ister ministri Erlan Turǵymbaev kólik urlyǵymen kúresti Eýraziialyq Odaq sheńberindegi áriptesterimen tize qosyp júzege asyratynyn alǵa tartty. Odaqqa múshe elder aldaǵy ýaqytta ortaq baza daiyndap, temir tulpardy barmytylaýshylarmen kúresýdi kózdep otyr. Statistikalyq málemetterge kóz júgirtetin bolsaq, Qazaqstanda urlanǵan kólikterdiń 85 paiyzy Reseige baǵyttalady eken. Al qalǵandary Odaqqa múshe ózge elderdiń naryǵynda qosalqy bólshek retinde saýdalandy.
– Aldaǵy ýaqytta eski jáne apatty jaǵdaidaǵy kóliktiń ieleri paidalanýǵa jaramsyz bolyp qalǵan kólikterin qosalqy bólshekti saýdalaýshylarǵa satqanda, olarǵa kóliktiń tehpasportyn qosa tapsyrýy tiis. Sol kezde bizder bazarda saýdalanyp jatqan eski qosalqy bólshekterdiń urlanǵan kóliktiń bólshegi emes ekenine kóz jetkizetin bolamyz, – deidi ministr Erlan Turǵymbaev.
Iá, elimizde avtokólik urlyǵynyń ýshyqqanyn qalmaimyz. Osy rette Ishki ister ministrliginiń jańa bastamasy kólik urlyǵyna qanshalyqty tyiym bolady degen suraq týyndaidy.
Bizdińshe, jańa bastamanyń kólik urlyǵyna qatysy joq sekildi. Onyń ústine bazarlarda saýdalynyp jatqan eski qosalqy bólshekterdiń kópshiligi Eýraziialyq Odaqqa múshe elderden keledi dep kesip aitý qiyn. Eski bólshekterdiń basym bóligi Eýropa elderinen keledi. Ony urlyq dep aitýǵa aýzyń barmaidy.
Jalpy, bazarlarda orta deńgeidegi sheteldik kólikterdiń qosalqy bólshekteri saýdalanatyny belgili. Kólik urlaityndar urylar 2000 jylǵa deiingi kólikterdi urlap, qoldaryn bulǵamasy anyq.
Urlasa bailar minetin aiǵyrdai Krýzaktardy urlaidy. Sondyqtan «Eýraziialyq odaqtyń urylary kólikterdi jappai urlap, bólshektep satyp jatyr» degen sóz qisynǵa kelmeidi.
Esik pen tórdei djip minetin shendiler kólikteri urlanǵan soń osyndai qadamǵa baryp otyrýy múmin.
Sonymen qatar bizdiń naryqty Reseidiń arzan sapasyz kólikteri jaýlap alǵany belgili. Al urylar orystyń spasyz kólikterine muryn shúiirip te qaramaidy.
Qazaqstanda olardyń jańa qosalqy bólshekterin saýdalaityn resmi dillerler jetedi. Ózi qalt-qult etip turǵan orystyń kóliginiń eski bólshegi kelesi bir kólikti jamap-jasqaýǵa kelmeitini anyq. Orystyń kóligin tizgindep júrgen jurt jańa qosalqy bólshekti alady. Óitkeni, jańa bólshekter arzan. Kez kelgen bazardan tabýǵa bolady.
Osy bir jaittardy nazarǵa alsańyz, jańa talap kólik urlyǵyna qatysy joq ekenin ańǵarǵandai bolasyń. Bir biletinimiz bazarda eski kóliktiń bólshekterin saýdalap júrgen qarapaiym saýdagerlerge qiyn bolaiyn dep tur. Budan keiin eski bólshekterdiń baǵasy qymbattap, halyqtyń jaǵdaiy qiyndai túsýi bek múmkin.
Al muny oilaǵan Erlan Turmaǵambetov bar ma eken. Kúni keshe ǵana Memleket basshysy Qasym-Jomart Toqaev Eýraziialyq ekonomikalyq keńestiń quzyretin keńeitýdi qoldamaitynyn ashyp aitty. Sol kezde Pýtin Toqaevtyń shapanyn sheship alǵanyn kórdik.
Bizdiń ministrler de aldaǵy ýaqytta Prezidentimizden úlgi alyp, Eýraziialyq Odaqtyń elimiz úshin oń jambasyna kelmeitin usynystaryn qarsy shyǵyp, halyqtyń múddesin bárinen de joǵary qoiatyn kez keldi dep esepteimiz.
Nurlan JUMAHAN
