Turdybek Qurmethan: «Myń ólip, myń tirilgen» qazaǵyma raqmet!
Bar qazaq bir birimizge raqmetimizdi aitaiyq. Ár qazaq bir birmizge baýyr bolǵanymyz úshin raqmet aitaiyq. Qazaqtyń táýelsiz otanynda ult úshin eńbek etip jatqan erlerimizge, ulttyń rýhyn kóterip qazaq atyn álemge tanytyp jatqan azamattarymyz ben azamatshalarymyzǵa, qai salada bolsa da eńbek etip jatqan barsha qazaq baýyrlarymyzǵa raqmetimizdi aitaiyq.
Osy kúnge aman jetip, elimizdi, jerimizdi, ulttyq sipatymyzdy saqtap qalǵanymyz úshin, ózgelerdiń qiianatynan bir birimizden alystap ketip, qaita basymyz qosylǵanda bir-birimizdi jatsynbaǵanymyz úshin raqmet, qazaǵym! Qazaq ǵasyrlar boiy az azap shekken joq. Qazirgi ie bolyp otyrǵan jerimizdiń ishinde bolsyn, syrtynda bolsyn bar qazaq óte aýyr kúnderdi bastan ótkizdi.
Qazaqtyń teń jarymynan astamy qyrylyp, bir bólimi shet asyp ketýge de májbúr boldy. Zulmat soǵysty da bastan ótkizdi. Keńes úkimeti jerimizdi talan-tarjyǵa salmaq ta boldy. Rýhymyzdy óshirip, tilimizdi joimaq boldy. Saǵymyzdy syndyryp, ózgege biletpek boldy. Qazaq osynyń bárimen kúrese bildi.
Alash Orda bolyp ult múddesi úshin azamattarymyz janyn sadaǵa etti. Bilikti ult múdesinen joǵary qoimaǵan Táshenov siiaqty arystarymyz jerimizdi saqtap qaldy. Jeltoqsanda jastarymyz qazaqtyń ór namysyn ózgege bastyrmaýǵa bel býdy. Táýelsizdik alǵan soń «bizdiń eldiń jigitteri» elimizdi «qoqsyqtardan» tazartty.
Budan da basqa aita bersek, qazaq haqynda áńgime taýsylmas.
«Men qazaqpyn, myń ólip, myń tirilgen» degendei, san joldy basyp búginge jetken qazaǵyma raqmet! Táýelsizdigimizge kýá bolǵan ár qazaqqa raqmetimdi aitamyn. Men Qazaqstannyń qazirgi aýmaǵynda ómir súrip, táýelsizdik alǵan kezimizde bizge shúiinshilep otanymyzǵa shaqyryp, kelgenimizde qushaq jaiyp qarsy alǵan ár qazaqqa basymdy iip turyp, raqmetimdi aitamyn. Biz álemdegi ár qazaq – azat qazaq bolyp, berekeli de baýyrmal bola bereiik! Qazaqtyǵymyzdan aiyrmaǵan jaratýshyǵa myń da bir raqmet!
