Fýtboldan Qazaqstan premer-ligasynyń kezekti týr oiyndary ótti. Túrkistan oblysynyń namysyn qorǵaityn «Turan» komandasy «Túrkistan Arena» stadionynda Petropavldyń «Qyzyljar» fýtbolshylaryn qabyldap, 1:0 esebimen jeńiske jetti. Tartysty oiynnyń 5-shi minýtynda turandyq Nikola Tsýkchich oiyndaǵy jalǵyz jeńis golyn soǵyp, áriptesterin alǵa shyǵardy. Oiynnyń qalǵan bóligi alma-kezek shabýyldarmen órbigenimen, esep ózgermedi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Osylaisha, «Turan» komandasy 21 týr aiasynda ótken kezdesýde 3 upaidy enshilep, týrnir kestesinde jaǵdailaryn birshama jaqsartyp aldy. Olar 19 upaimen 11-shi orynda keledi. «Turannyń» qatarynan 2 ret jeńiske jetýine «Túrkistan Arena» stadionyna oralýy da óz áserin tigizdi. Eki oiynda da stadionda jankúierler qatary qalyń bolyp, fýtbolshylarǵa shabyt syilai bildi.
Taǵy bir aita keterligi, oiynnan keiin Túrkistan oblystyq qoǵamdyq damý basqarmasynyń «Jastar resýrstyq ortalyǵy» KMM-niń úilestirýimen Túrkistannyń belsendi jastary stadionda tazalyq jumystaryn júrgizip, kópshilikke úlgi kórsete bildi.
Endi «Turan» aiaqdop sheberleri 27-shi qyrkúiek kúni Shymkentte «Ordabasy» komandasymen kezdesedi.
