Jiti respıratorlyq vırýstyq ınfeksıalarǵa jatatyn metapnevmovırýstyń álemde taralýy týraly BAQ-taǵy sońǵy habarlarǵa baılanysty QR Densaýlyq saqtaý mınıstrligi qazaqstandyqtarǵa úndeý jasady, dep habarlaıdy Dalanews.kz.

“Adam metapnevmovırýsy — kóptegen elde ondaǵan jyl boıy taralǵan klasıkalyq vırýstardyń biri. Qazaqstanda metapnevmovırýs JRVI jáne tumaýdyń maýsymdyq órshýi kezeńinde basqa vırýstarmen qatar anyqtaldy”, — dep málimdedi mınıstrlik.

Sanıtarıalyq-epıdemıologıalyq baqylaý komıtetiniń málimeti boıynsha, epıdemıalyq maýsym bastalǵannan beri respýblıka boıynsha tumaýǵa jatpaıtyn vırýstarǵa qarsy 8 360 úlgi zerttelip, onyń 1 866-sy (22%) oń nátıje kórsetken.

“Olardyń arasynda paratumaý – 178 (9,5%), RS vırýsy – 433 (23,2%), metapnevmovırýs – 30 (1,6%), rınovırýs – 680 (36,4%), bokavırýs – 113 (6,1%), adenovırýs – 226 (12,1%), koronavırýs – 206 (11,1%) jaǵdaıy tirkeldi”, — dep qosty vedomstvo.

Metapnevmovırýs negizinen aýa arqyly taralady jáne keıde turmystyq baılanys arqyly da berilýi múmkin. Vırýs belgilerine jótel, murynnan sý aǵý, entigý, bas aýrýy jáne tyrysý jatady. Aýrýdyń naqty emi joq, tek sımptomatıkalyq em júrgiziledi.

Qazaqstanda JRVI men tumaýdyń maýsymdyq ósýi 1 qazannan beri tirkelip, respýblıkada JRVI-diń 2 002 335 jaǵdaıy jáne zerthanalyq rastalǵan tumaýdyń 941 jaǵdaıy, onyń ishinde A(H1N1) tıpti tumaýdyń 910 jaǵdaıy, A(H3N2)-1 jaǵdaıy, V tumaýynyń 30 tirkeldi.

Densaýlyq saqtaý mınıstrligi azamattardy profılaktıkalyq sharalardy saqtaýǵa, adamdar kóp jınalatyn jerlerde baılanysty shekteýge shaqyrady. Bul, ásirese, sozylmaly aýrýlary bar adamdar úshin asa mańyzdy.

Tumaý men JRVI-diń profılaktıka sharalary:

• Adamdar kóp jınalatyn oryndarǵa, ásirese jabyq úı-jaılarǵa barýdy shekteý;

• Úı-jaılardy únemi jeldetý;

• Qoldy tazartý úshin antıseptıkter men dezınfeksıalyq maılyqtar qoldaný;

• Aýrý adamdarmen baılanys ornatpaý jáne olardy oqshaýlaý;

• Tumaý men JRVI belgileri paıda bolǵan kezde balalardy úıde qaldyryp, uıymdasqan ujymdarǵa jibermeý;

• Aýrý belgileri paıda bolǵan jaǵdaıda ýaqytyly medısınalyq kómekke júginý.

Densaýlyq saqtaý mınıstrligi azamattardy osy erejelerdi saqtaýǵa shaqyryp, juqpaly aýrýlardyń aldyn alý qajettigin eskertedi.