Túrkistan oblysy Túlkibas aýdanynyń turǵyny Ájibaı Sabýrov japon qarbyzy «Densýke» sortyn egýdi qolǵa alǵan. 77 jastaǵy qarıa byltyr reseılik «Volgograd» tuqymyn egip, mol paıdaǵa kenelgen, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

– Taýly meken Túlkibastyń aýa-raıy Saryaǵash, Jetisaı, Shardara sıaqty aýdandarǵa qaraǵanda salqyndaý bolyp keledi. Sondyqtan da baqsha ónimderiniń bul túrleri bizde egile bermeıdi. Al, qarbyzdyń «Densýke» jáne «Volgograd» atty tuqymdary bizdiń klımatqa tózimdirek bolyp keledi. Onyń ózin ashyq alańqaıda emes, jylyjaıda óndirip alamyz. Iaǵnı, tamyr jaıyp, ónim bergenshe ózine tán kútimdi qajet etedi, – dedi baǵban qarıa.

Búginde Ájibaı aqsaqaldyń 6 gektar jerinde qaýynnyń 3, qarbyzdyń 6 túri jaıqalyp tur. Onyń sózinshe, qarbyz tamyz aıynyń orta sheginde pisip jetiledi.

Ár gektarynan 30 tonnaǵa jýyq ónim alýdy kózdep otyr. Aıta keteıik, kópke úlgi bolyp otyrǵan aqsaqal qosymsha 3 gektar jerge ekken kartobynan, gektaryna 40-50 tonnaǵa jýyq ónim alýdy josparlap qoıǵan.