Túlkibas aýdanynda 48 otbasyǵa páter kiltteri tabystaldy. Bul – memleket tarapynan halyqtyń áleýmettik jaǵdaiyn jaqsartýǵa baǵyttalǵan naqty qoldaýdyń nátijesi, – dep habarlaidy Dalanews.kz
Saltanatty sharaǵa aýdan ákimi Asqar Estibaev pen aýdandyq máslihattyń tóraǵasy Serǵali Sársenbaev qatysyp, qonys toi ieleriniń qýanyshtarymen bólisti.
– Memleket basshysy Qasym-Jomart Toqaevtyń halyqty baspanamen, jumyspen qamtýǵa arnalǵan baǵdarlamalarynyń nátijesinde qanshama otbasy baspanaly bolyp, jumysqa ornalasýda. Búgingi tańda Túlkibas aýdanynda turǵyn úi kezeginde 3250-den astam azamat bolsa, sonyń ishinde búgin 48 azamat jańa baspanaǵa qol jetkizdi. Onyń ishinde ata-ananyń qaraýynsyz qalǵan balalar, kópbalaly otbasylar, jalǵyzbasty analar, múmkindigi shekteýli balalardy tárbielep otyrǵan januialar men jas otbasylar bar. Bul baǵyttaǵy jumystar osymen toqtap qalmai, aldaǵy ýaqytta jalǵasyn tabady, – dedi aýdan ákimi.
Búgin baspanaly bolǵandardyń qatarynda kópbalaly 7 balany tárbielep, ósirip otyrǵan altynqursaqty ana Sulýshash Nurymbetova bar.
– Úi kezegine 2018 jyly kópbalaly ana retinde turǵan bolatynmyn. Búgin, mine, memleketimizdiń qoldaýymen jáne bala-shaǵamnyń nesibesine orai úsh bólmeli páterge qol jetkizip otyrmyn. Barsha búgingi qonys toiyn toilaǵaly otyrǵan kórshilerimdi jańa úilerimen quttyqtaimyn. Jáne de úige qol jetkize almai júrgen jandarǵa juǵysty bolsyn degim keledi, – dedi baspanaǵa qol jetkizgen kópbalaly ana.
Aita keteiik, biylǵy jyldyń naýryz aiynda aýdan ortalyǵyna qarasty «Nurshýaq» shaǵynaýdanynda 56 jańa páter kiltteri úi kezeginde turǵan azamattarǵa tabystalǵan bolatyn. Osylaisha, biyl 104 túlkibastyq jańa baspanaǵa qol jetkizip otyr.
