تۇلكىباس اۋدانىندا 48 وتباسىعا پاتەر كىلتتەرى تابىستالدى. بۇل – مەملەكەت تاراپىنان حالىقتىڭ الەۋمەتتىك جاعدايىن جاقسارتۋعا باعىتتالعان ناقتى قولداۋدىڭ ناتيجەسى، – دەپ حابارلايدى Dalanews.kz
سالتاناتتى شاراعا اۋدان اكىمى اسقار ەستىبايەۆ پەن اۋداندىق ءماسليحاتتىڭ ءتوراعاسى سەرعالي سارسەنبايەۆ قاتىسىپ، قونىس توي يەلەرىنىڭ قۋانىشتارىمەن ءبولىستى.
– مەملەكەت باسشىسى قاسىم-جومارت توقايەۆتىڭ حالىقتى باسپانامەن، جۇمىسپەن قامتۋعا ارنالعان باعدارلامالارىنىڭ ناتيجەسىندە قانشاما وتباسى باسپانالى بولىپ، جۇمىسقا ورنالاسۋدا. بۇگىنگى تاڭدا تۇلكىباس اۋدانىندا تۇرعىن ءۇي كەزەگىندە 3250-دەن استام ازامات بولسا، سونىڭ ىشىندە بۇگىن 48 ازامات جاڭا باسپاناعا قول جەتكىزدى. ونىڭ ىشىندە اتا-انانىڭ قاراۋىنسىز قالعان بالالار، كوپبالالى وتباسىلار، جالعىزباستى انالار، مۇمكىندىگى شەكتەۋلى بالالاردى تاربيەلەپ وتىرعان جانۇيالار مەن جاس وتباسىلار بار. بۇل باعىتتاعى جۇمىستار وسىمەن توقتاپ قالماي، الداعى ۋاقىتتا جالعاسىن تابادى، – دەدى اۋدان اكىمى.
بۇگىن باسپانالى بولعانداردىڭ قاتارىندا كوپبالالى 7 بالانى تاربيەلەپ، ءوسىرىپ وتىرعان التىنقۇرساقتى انا سۇلۋشاش نۇرىمبەتوۆا بار.
– ءۇي كەزەگىنە 2018 جىلى كوپبالالى انا رەتىندە تۇرعان بولاتىنمىن. بۇگىن، مىنە، مەملەكەتىمىزدىڭ قولداۋىمەن جانە بالا-شاعامنىڭ نەسىبەسىنە وراي ءۇش بولمەلى پاتەرگە قول جەتكىزىپ وتىرمىن. بارشا بۇگىنگى قونىس تويىن تويلاعالى وتىرعان كورشىلەرىمدى جاڭا ۇيلەرىمەن قۇتتىقتايمىن. جانە دە ۇيگە قول جەتكىزە الماي جۇرگەن جاندارعا جۇعىستى بولسىن دەگىم كەلەدى، – دەدى باسپاناعا قول جەتكىزگەن كوپبالالى انا.
ايتا كەتەيىك، بيىلعى جىلدىڭ ناۋرىز ايىندا اۋدان ورتالىعىنا قاراستى «نۇرشۋاق» شاعىناۋدانىندا 56 جاڭا پاتەر كىلتتەرى ءۇي كەزەگىندە تۇرعان ازاماتتارعا تابىستالعان بولاتىن. وسىلايشا، بيىل 104 تۇلكىباستىق جاڭا باسپاناعا قول جەتكىزىپ وتىر.
