Túrkistan oblysynyń ákimi Darhan Satybaldy óńirde tut klasterin damytý jóninde tapsyrma bergen bolatyn. Oblys aýmaǵynda tut sharýashylyǵyn damytyp, odan jibek mata óndirý maqsatynda Túlkibas aýdany ákimdiginiń tikelei qoldaýymen klimaty tut sharýshylyǵyna qolaily aimaq bolyp sanalatyn aýdanda biyl tut aǵashtarynyń kóshetterin keminde 10 gektar jerge egý josparlanýda, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Bekitilgen mejeniń búgingi tańda 5 gektaryna kóshet egý jumystaryn Arys aýyldyq okrýgine qarasty «Nurlan» sharýa qojalyǵy bastap ketti. Japyraǵyn jylyna tórt ret jinaýǵa bolatyn egilgen tuttyń sorty «Ándijan Marhamat – 2017» dep atalady.
Kóshet egý jáne ony kútip baptaý jumystarynyń barlyq talaptarǵa sai bolýy «Qazaq jibek» birlestiginiń tikelei qadaǵalaýymen iske asýda. Budan bólek biyl Túlkibas aýdanynda tut sharýashylyǵymen ainalysýǵa Aqbiik, Mailykent jáne Shaqpaq aýyldyq okrýginiń agroqurylymdary qyzyǵýshylyq tanytyp otyr.
Sonyń biri, Mailykent aýyldyq okrýgine qarasty «Saparǵali» sharýa qojalyǵy 7 gektar jer telimine atalǵan tut sortynyń kóshetin osy aptanyń ishinde egýdi bastaǵaly tur.
Tut otyrǵyzyp, jibek óndirýge niet bildirgen turǵyndarǵa «Aýyl amanaty» baǵdarlamasy (jyldyq ústemesi 2,5 paiyzdan aspaityn nesie) boiynsha qarjylai qoldaý kórsetý tetikteri qarastyrylǵan. Tut aǵashyn otyrǵyzǵan sharýalar alǵashqy óinimin alǵansha 20 aiǵa deiin demalys ala alady.
Tut sharýashylyǵy boiynsha jibek talshyǵy tut japyraqtarymen qorektengen jibek qurtynan alynady. Al jibek qurtynyń negizgi azyǵy – tut aǵashy. Jibek óndirisi – álemdegi eń tabysty kásipterdiń biri. 1 gektar jerge egilgen tut aǵashynan 1,5 mln. teńgege deiin taza tabys tabýǵa múmkindik bar. Al ónimdi Shyǵys Eýropaǵa, Ońtústik Koreiaǵa jáne Qytaiǵa satýǵa bolady. Óitkeni mundai taýarǵa atalǵan elderde suranys óte joǵary.
