Túlkibas aýdanynda kásipkerler arqyly sport nysandaryn kóbeıtý jumystary júrip jatyr. Solardyń biri – Azattyq eldi mekenindegi «Sport servıs Azattyq» atty sport kesheni, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Ótken jyly Azattyq eldi mekeninen Bekmuratov Atamurat esimdi jeke kásipkerdiń óz qarjysy esebinen ashylǵan nysanda búgingi tańda 600-ge jýyq mektep jasyndaǵy bala sporttyń 8 túrinen (boks, kúres, dzúdo, thekvando, voleıbol, ústel tenısi, fýtbol, gımnastıka) úıirmelerge qatysyp, bos ýaqyttaryn tıimdi ótkizýde.

Budan bólek keshenniń qosymsha ǵımaratyna tigin sehy ashylyp, tapsyrystar qabyldap, qazirgi tańda  jumysyn júrgizýde. Kásipker ótken jyly úıirmeniń úsh túrine qajetti aımaqty daıyndasa, bıyl qosymsha 5 úıirmege kerekti zaldardy iske qosqan. Jalpy keshenniń qurylysyna 200 mln. teńgege jýyq óz qarjysyn jumsaǵan.

Atalǵan nysanǵa aýdan ákimi Nurjan İztileýov arnaıy taban tirep, kásipkerdiń jumysyna oń baǵasyn berdi. Kásibin ulǵaıtýǵa memleketten qoldaýlar qajet bolǵan jaǵdaıda, kómek berýge daıyn ekenin jetkizdi.

Atalǵan kásipkerlik nysanda 30-dan astam aýyl turǵyndary jumyspen qamtylyp otyr.

Aıta keteıik, búgingi tańda aýdanda 5 oblystyq, «Er Jánibek» sport klýby, «Túlkibas sport klýb» jáne múmkindigi shekteýli balalarǵa arnalǵan sport mektebi halyqqa qyzmet kórsetedi. Osy atalǵan 8 sport mekemesinde 5258 oqýshy sporttyń 22 túrinen qamtylǵan. Sondaı-aq bıyl Rysqulov aýyldyq okrýginen jeke kásipker A.Toıshybekovtyń esebinen jalpy quny 150 mln. teńgege fýtbol alańshasy ashylyp, aýyl turǵyndaryna paıdalanýǵa berilse, Kereıt, Maıtóbe jáne Alǵabas aýyldarynda jabyq fýtbol alańshalarynyń qurylysy júrgizilýde.