AQSh prezidenti Donald Tramptyń Iranmen kelissózder týraly málimdemesinen keiin munai baǵasy kúrt quldyrady, dep habarlaidy dalanews.kz.
20 mamyrdaǵy saýda-sattyq barysynda munai baǵasy bir kúnde shamamen 6 paiyzǵa tómendegen. Buǵan Tramptyń Vashington men Tegeran arasyndaǵy kelissózderdiń sońǵy kezeńge jaqyndaǵanyn málimdeýi sebep bolǵan. Bul týraly Yahoo Finance jazdy.
Atap aitqanda, shilde aiyna arnalǵan WTI markaly munai fiýchersteri 5,89 dollarǵa, iaǵni 5,66 paiyzǵa arzandady. Naryq qatysýshylary Iran munaiynyń álemdik naryqqa qaita oralýy múmkin ekenin jáne Ormýz buǵazynyń ashylýy yqtimal ekenin aita bastaǵan.
Tramp Iranmen kelissózderdiń sheshýshi kezeńine jetkenin aityp, Tegerannyń áreketin "aqylǵa qonymdy" dep baǵalaǵan. Sondai-aq ol beibit kelisimge kelý úshin Iranǵa kelesi aptanyń basyna deiin ýaqyt berilýi múmkin ekenin jetkizdi.
Aita keteiik, AQSh pen Iran arasyndaǵy qaqtyǵys Ormýz buǵazyndaǵy jaǵdaidy kúrdelendirgen edi. Álemdegi munai men suiytylǵan gazdyń shamamen besten biri dál osy strategiialyq baǵyt arqyly tasymaldanady.
Sonymen qatar munai baǵasyna NATO elderiniń de yqpaly tigen. Qazirgi tańda alians elderi Ormýz buǵazy jabyq kúiinde qalsa, shilde aiynan keiin saýda kemelerin áskeri súiemeldeý máselesin talqylap jatyr. Sarapshylardyń pikirinshe, bul Parsy shyǵanaǵyndaǵy munaidyń bir bóligin qaitadan álemdik naryqqa shyǵarýǵa múmkindik berýi múmkin.
Degenmen mamandar álemdik munai naryǵyndaǵy tapshylyq jaqyn arada joiylmaitynyn aitady. Halyqaralyq energetika agenttiginiń málimetinshe, naýryz-sáýir ailarynda álemdik qor kún saiyn shamamen 4 million barrelge qysqarǵan.
Sarapshylardyń boljamynsha, soǵys jaqyn arada aiaqtalǵan kúnniń ózinde, munai naryǵyndaǵy aitarlyqtai tapshylyq kem degende qazan aiyna deiin saqtalýy múmkin.
Al Goldman Sachs deregine sáikes, Parsy shyǵanaǵyndaǵy munai óndirisi táýligine 14,5 million barrelge deiin tómendegen. Daǵdarys bastalǵaly beri álemdik qoimalardan shamamen 500 million barrel munai alynǵan. Maýsym aiyna qarai bul kórsetkish 1 milliard barrelge jetýi múmkin.
