AQSh-tyń Qazaqstanǵa jariialaǵan 25 paiyzdyq jańa tarifteri qoǵamda kádimgidei dúrligý týǵyzǵanymen, shyn máninde el ekonomikasyna tigizer áseri bolmashy eken. Búgin Astanada ótken baspasóz máslihatynda Eýraziialyq turaqtandyrý jáne damý qorynyń bas ekonomisi Sergei Ýlatov osyndai pikir aitty, dep habarlaidy Dalanews.kz.
Ekonomistiń sózinshe, jańa baj salyǵy qorqynyshty kóringenimen, muqiiat zerdelegen adam onyń negizinen qaǵaz júzindegi ses kórsetý ekenin birden baiqaidy.
"Biz tariftiń yqtimal saldaryn tereńnen taldadyq. Jasaǵan qorytyndymyz: alańdaityndai qaýip joq. Qazaqstan eksportynyń basym bóligi bul tarifke múldem ilinbeidi. Sondyqtan ekonomikaǵa keri áseri minimaldy, tipti baiqalmaidy deýge de bolady", – dedi ol.
Qazaqstan boiynsha qordyń eldik ekonomisi Ǵalymjan Aitqazin de bul oidy rastap otyr. Onyń aitýynsha, AQSh ákimshiligi saýda defitsiti joǵary degen elder tizimin alyp, bárine birdei habarlama jibergen. Alaida, Vashington usynǵan qujatta kóptegen taýarlarǵa arnaiy jeńildikter bar. Osy jaǵynan alǵanda, Qazaqstannyń eksportyna salmaq salatyn ónimder óte az bolyp shyqty.
"Shtattardyń esebinshe, eki el arasynda saýda teńsizdigi bar. Biraq bizdiń eksporttyń 95 paiyzy – munai, metall, shikizat tárizdi ónimder baj salyǵynan tolyq bosatylǵan. Tariftiń áserine túsetin taýarlar úlesi – bar-joǵy 5 paiyz, aqshalai eseptegende 100 mln dollardan da aspaidy. Bul – Qazaqstan úshin aitarlyqtai shyǵyn emes. Buqaralyq aqparat quraldary máseleni tym ýshyqtyryp kórsetkenimen, shyn máninde jaǵdai sonshalyqty kúrdeli emes", – dedi ekonomist.
Sondai-aq ol baj salyǵyna ilingen 5 paiyz taýarlar úlesin basqa baǵytqa aýystyrý múmkindigi de baryn eske saldy.
Aita ketsek, 8 shilde kúni AQSh prezidenti Donald Tramp Qazaqstan basshysy Qasym-Jomart Toqaevqa hat joldap, 1 tamyzdan bastap qazaqstandyq taýarlarǵa 25 paiyzdyq baj salyǵy salynatynyn eskertken edi. Búgin Prezident Toqaev atalǵan tarifke qatysty jaýap berdi.
