اقش-تىڭ قازاقستانعا جاريالاعان 25 پايىزدىق جاڭا تاريفتەرى قوعامدا كادىمگىدەي دۇرلىگۋ تۋعىزعانىمەن، شىن مانىندە ەل ەكونوميكاسىنا تيگىزەر اسەرى بولماشى ەكەن. بۇگىن استانادا وتكەن باسپا ءسوز ءماسليحاتىندا ەۋرازيالىق تۇراقتاندىرۋ جانە دامۋ قورىنىڭ باس ەكونوميسى سەرگەي ۋلاتوۆ وسىنداي پىكىر ايتتى، دەپ حابارلايدى Dalanews.kz.
ەكونوميستىڭ سوزىنشە، جاڭا باج سالىعى قورقىنىشتى كورىنگەنىمەن، مۇقيات زەردەلەگەن ادام ونىڭ نەگىزىنەن قاعاز جۇزىندەگى سەس كورسەتۋ ەكەنىن بىردەن بايقايدى.
"ءبىز ءتاريفتىڭ ىقتيمال سالدارىن تەرەڭنەن تالدادىق. جاساعان قورىتىندىمىز: الاڭدايتىنداي ءقاۋىپ جوق. قازاقستان ەكسپورتىنىڭ باسىم بولىگى بۇل تاريفكە مۇلدەم ىلىنبەيدى. سوندىقتان ەكونوميكاعا كەرى اسەرى مينيمالدى، ءتىپتى بايقالمايدى دەۋگە دە بولادى"، – دەدى ول.
قازاقستان بويىنشا قوردىڭ ەلدىك ەكونوميسى عالىمجان ايتقازين دە بۇل ويدى راستاپ وتىر. ونىڭ ايتۋىنشا، اقش اكىمشىلىگى ساۋدا دەفيسيتى جوعارى دەگەن ەلدەر ءتىزىمىن الىپ، بارىنە بىردەي حابارلاما جىبەرگەن. الايدا، ۆاشينگتون ۇسىنعان قۇجاتتا كوپتەگەن تاۋارلارعا ارنايى جەڭىلدىكتەر بار. وسى جاعىنان العاندا، قازاقستاننىڭ ەكسپورتىنا سالماق سالاتىن ونىمدەر وتە از بولىپ شىقتى.
"شتاتتاردىڭ ەسەبىنشە، ەكى ەل اراسىندا ساۋدا تەڭسىزدىگى بار. ءبىراق ءبىزدىڭ ەكسپورتتىڭ 95 پايىزى – مۇناي، مەتالل، شيكىزات ءتارىزدى ونىمدەر باج سالىعىنان تولىق بوساتىلعان. ءتاريفتىڭ اسەرىنە تۇسەتىن تاۋارلار ۇلەسى – بار-جوعى 5 پايىز، اقشالاي ەسەپتەگەندە 100 ملن دوللاردان دا اسپايدى. بۇل – قازاقستان ءۇشىن ايتارلىقتاي شىعىن ەمەس. بۇقارالىق اقپارات قۇرالدارى ماسەلەنى تىم ۋشىقتىرىپ كورسەتكەنىمەن، شىن مانىندە جاعداي سونشالىقتى كۇردەلى ەمەس"، – دەدى ەكونوميست.
سونداي-اق ول باج سالىعىنا ىلىنگەن 5 پايىز تاۋارلار ۇلەسىن باسقا باعىتقا اۋىستىرۋ مۇمكىندىگى دە بارىن ەسكە سالدى.
ايتا كەتسەك، 8 شىلدە كۇنى اقش پرەزيدەنتى دونالد ترامپ قازاقستان باسشىسى قاسىم-جومارت توقايەۆقا حات جولداپ، 1 تامىزدان باستاپ قازاقستاندىق تاۋارلارعا 25 پايىزدىق باج سالىعى سالىناتىنىن ەسكەرتكەن ەدى. بۇگىن پرەزيدەنت توقايەۆ اتالعان تاريفكە قاتىستى جاۋاپ بەردى.
