AQSh-tyń Florida shtatynda halyqaralyq áýejaidy Donald Tramptyń atymen ataý týraly bastama qyzý talqylanýda, dep habarlaidy Dalanews.kz.
Shtattyń Ókilder palatasy Palm Beach International Airport ataýyn President Donald J. Trump International Airport dep ózgertý týraly zań jobasyn 81 daýysqa qarsy 30 daýyspen qoldady.
Bastamany respýblikashyldar kóterip otyr. Zań jobasynyń teń avtory, Palm-Bich okrýginiń ókili Meg Vainbergerdiń aitýynsha, Tramp mundai qurmetke laiyq, sebebi ol áýejaidan nebári bes mil qashyqtyqta turady. Taǵy bir respýblikashyl depýtat Kim Kendall prezident ákimshiliginiń áýejai infraqurylymyn jańǵyrtýǵa salǵan investitsiialaryn atap ótti. Al Stiýart okrýginiń ókili Djon Snaider zań qabyldansa, áýejai «resmi túrde uly» bolatynyn málimdedi.
Alaida demokrattar bul sheshimge qarsy. Olar áýejai ataýyn ózgertý prezidenttiń ókilettik merzimi aiaqtalǵannan keiin ǵana qarastyrylýy tiis dep esepteidi. Demokrattar Tramptyń eki márte impichmentke ushyraǵanyn jáne Niý-Iorkte iskerlik qujattardy burmalaý isi boiynsha 34 aiyptaý úkimi shyqqanyn alǵa tartty. Maiami ókili Eshli Gantt «qazirgi kórip otyrǵan mura kóńil kónshitpeidi» dep málimdedi.
Zań jobasy Senatqa joldanǵan. Eger ol qoldaý tapsa, áýejai mańdaishalary men infraqurylym elementterin aýystyrýǵa 2,75 mln dollar bólinýi múmkin. Ýest-Palm-Bichtegi bul áýejai jyl saiyn shamamen 8,6 mln jolaýshyǵa qyzmet kórsetedi.
Sonymen qatar bastama avtorlary Tramptyń otbasy áýejai ataýyna bailanysty saýda belgisine quqyq talap etpeitinin málimdedi. Demokrattar áýejaiǵa Tramp pen Djon Kennedidiń esimin birge berý týraly usynys jasaǵanymen, ol qoldaý tappady.
Floridadaǵy bul bastama AQSh-taǵy saiasi poliarizatsiianyń kezekti kórinisine ainalyp otyr.
