اقش-تىڭ فلوريدا شتاتىندا حالىقارالىق اۋەجايدى دونالد ترامپتىڭ اتىمەن اتاۋ تۋرالى باستاما قىزۋ تالقىلانۋدا، دەپ حابارلايدى Dalanews.kz.
شتاتتىڭ وكىلدەر پالاتاسى Palm Beach International Airport اتاۋىن President Donald J. Trump International Airport دەپ وزگەرتۋ تۋرالى زاڭ جوباسىن 81 داۋىسقا قارسى 30 داۋىسپەن قولدادى.
باستامانى رەسپۋبليكاشىلدار كوتەرىپ وتىر. زاڭ جوباسىنىڭ تەڭ اۆتورى، پالم-بيچ وكرۋگىنىڭ وكىلى مەگ ۆاينبەرگەردىڭ ايتۋىنشا، ترامپ مۇنداي قۇرمەتكە لايىق، سەبەبى ول اۋەجايدان نەبارى بەس ميل قاشىقتىقتا تۇرادى. تاعى ءبىر رەسپۋبليكاشىل دەپۋتات كيم كەندالل پرەزيدەنت اكىمشىلىگىنىڭ اۋەجاي ينفراقۇرىلىمىن جاڭعىرتۋعا سالعان ينۆەستيسيالارىن اتاپ ءوتتى. ال ستيۋارت وكرۋگىنىڭ وكىلى دجون سنايدەر زاڭ قابىلدانسا، اۋەجاي «رەسمي تۇردە ۇلى» بولاتىنىن مالىمدەدى.
الايدا دەموكراتتار بۇل شەشىمگە قارسى. ولار اۋەجاي اتاۋىن وزگەرتۋ پرەزيدەنتتىڭ وكىلەتتىك مەرزىمى اياقتالعاننان كەيىن عانا قاراستىرىلۋى ءتيىس دەپ ەسەپتەيدى. دەموكراتتار ترامپتىڭ ەكى مارتە يمپيچمەنتكە ۇشىراعانىن جانە نيۋ-يوركتە ىسكەرلىك قۇجاتتاردى بۇرمالاۋ ءىسى بويىنشا 34 ايىپتاۋ ۇكىمى شىققانىن العا تارتتى. مايامي وكىلى ەشلي گانتت «قازىرگى كورىپ وتىرعان مۇرا كوڭىل كونشىتپەيدى» دەپ مالىمدەدى.
زاڭ جوباسى سەناتقا جولدانعان. ەگەر ول قولداۋ تاپسا، اۋەجاي ماڭدايشالارى مەن ينفراقۇرىلىم ەلەمەنتتەرىن اۋىستىرۋعا 2،75 ملن دوللار ءبولىنۋى مۇمكىن. ۋەست-پالم-بيچتەگى بۇل اۋەجاي جىل سايىن شامامەن 8،6 ملن جولاۋشىعا قىزمەت كورسەتەدى.
سونىمەن قاتار باستاما اۆتورلارى ترامپتىڭ وتباسى اۋەجاي اتاۋىنا بايلانىستى ساۋدا بەلگىسىنە قۇقىق تالاپ ەتپەيتىنىن مالىمدەدى. دەموكراتتار اۋەجايعا ترامپ پەن دجون كەننەديدىڭ ەسىمىن بىرگە بەرۋ تۋرالى ۇسىنىس جاساعانىمەن، ول قولداۋ تاپپادى.
فلوريداداعى بۇل باستاما اقش-تاعى ساياسي پولياريزاسيانىڭ كەزەكتى كورىنىسىنە اينالىپ وتىر.
