AQSh prezidenti Donald Tramptyń reitingi tómendep jatyr. Qazir amerikalyqtardyń bir bóligi ǵana onyń jumysyn qoldasa, kópshilik prezident saiasatyna kóńili tolmaitynyn bildirip otyr, dep habarlaidy dalanews.kz.
Sońǵy saýalnamalarǵa qaraǵanda, Trampty qoldamaityndar sany qoldaityndardan edáýir kóp. Bul kórsetkish onyń ekinshi prezidenttik merzimindegi eń álsiz kezeńderdiń biri retinde baǵalanyp jatyr.
Sarapshylar reitingtiń quldyraýyna birneshe faktor áser etkenin aitady. Sonyń ishinde eń basty sebep – ekonomika. Amerikalyqtardyń basym bóligi eldegi ekonomikalyq jaǵdaidy «ortasha» nemese «nashar» dep baǵalaidy. Kópshilik baǵanyń ósýi, kúndelikti shyǵynnyń artýy jáne ómir súrýdiń qymbattaýyna alańdap otyr.
Iran tóńiregindegi áskeri-saiasi jaǵdai da Tramptyń bedeline keri áser etken. Degenmen sarapshylardyń pikirinshe, syrtqy saiasattaǵy qiyndyqtardan da aýyr soqqyny prezidentke ishki ekonomika berip otyr. Sebebi qarapaiym sailaýshy úshin eń mańyzdy másele – qaltasyndaǵy aqsha, azyq-túlik baǵasy jáne janarmai quny.
Tramptyń infliatsiiamen kúreske qatysty kórsetkishi de aitarlyqtai tómendegen. Buǵan janarmai baǵasynyń ósýi áser etken. Buǵan deiin benzin baǵasy 3 dollardan tómen bolǵany aitylsa, qazir onyń 4 dollardan asyp ketkeni halyq narazylyǵyn kúsheitti.
Ekonomikalyq qysym ásirese aldaǵy aralyq sailaý qarsańynda respýblikashyldar úshin qaýipti belgi bolýy múmkin. Kei boljamdarǵa sáikes, demokrattardyń Ókilder palatasynda basymdyq alýǵa múmkindigi joǵary. Al Senattaǵy jaǵdai ázirge naqty emes.
Trampqa qatysty kóńil kúi shtattar boiynsha da ártúrli. Demokrattar basym óńirlerde onyń reitingi óte tómen. Biraq alańdatarlyǵy – ony 2024 jyly qoldaǵan shtattardyń ózinde narazylyq kóbeie bastaǵan.
Prezidentti negizinen aq násildi sailaýshylar men er adamdar kóbirek qoldaidy. Al jastar, etnikalyq azshylyq ókilderi, joǵary bilimdi azamattar jáne zeinetkerler arasynda oǵan senim álsiregeni baiqalady.
Qoǵamdaǵy basty máseleler de saiasi kózqarasqa qarai ekige bólingen. Trampty jaqtaityn respýblikashyldar úshin immigratsiia, salyq jáne memlekettik shyǵyndar mańyzdy bolsa, demokrattar densaýlyq saqtaý, klimattyń ózgerýi jáne áleýmettik qorǵaý máselelerine kóbirek nazar aýdarady.
Osylaisha, Tramp reitinginiń tómendeýine bir ǵana sebep emes, birneshe másele qatar áser etip otyr. Biraq eń negizgi soqqy ekonomikadan keldi. Baǵanyń ósýi, benzinniń qymbattaýy jáne halyqtyń bolashaqqa seniminiń álsireýi prezidenttiń saiasi jaǵdaiyn qiyndatyp jiberdi.