Maýsym-shilde ailarynda terrorizm jáne ekstremizm qylmystary boiynsha 19 adam sottalyp, taǵy 28 adam ustaldy, dep habarlaidy dalanews.kz.
Ulttyq qaýipsizdik komitetiniń (UQK) málimetinshe, tergelgen qylmystyq ister boiynsha 19 adam ártúrli merzimge bas bostandyǵynan aiyrylǵan.
Sottalǵandardyń biri – Almaty qalasynyń týmasy. Ol 2017 jyldan beri halyqaralyq terroristik uiymdardyń qyzmetine qatysqany úshin izdeýde bolǵan. Er adam Túrkiiada anyqtalyp, 2025 jyly Qazaqstanǵa deportatsiialanǵan. Elge kelgennen keiin qylmystyq is aiasynda qamaýǵa alynǵan. Sot ony segiz jylǵa bas bostandyǵynan aiyrdy.
Taǵy bir sottalǵan Shymkent turǵyny áleýmettik jelilerde terrorizm ideologiiasyn nasihattap, tanystaryn zorlyq-zombylyq áreketterin jasaýǵa shaqyrǵan. Ol toǵyz jylǵa sottaldy.
Sol kezeńde Astana, Almaty jáne Shymkent qalalarynda, sondai-aq Aqmola, Aqtóbe, Almaty, Jambyl, Mańǵystaý jáne Túrkistan oblystarynda jedel-izdestirý sharalary nátijesinde 28 adam ustaldy.
UQK málimetinshe, ustalǵandar terrorizmdi nasihattady, dini arazdyqty qozdyrdy, internette jáne óz ortasynda tyiym salynǵan materialdardy taratty, sondai-aq ekstremistik uiymnyń qyzmetine qatysty degen kúdikke ilingen.
Qazir Qylmystyq kodekstiń tiisti baptary boiynsha sotqa deiingi tergeý júrgizilip jatyr.
UQK Qylmystyq-protsestik kodekstiń 201-babynyń 1-bóligine sáikes, ózge aqparat jariia etilmeitinin habarlady.
