AQSh prezidenti Donald Tramp Ýkraina prezidenti Vladimir Zelenskiidi Reseidiń dizel otynyn óndirýge jáne óńdeýge qatysty infraqurylymyna soqqy berýdi toqtatýǵa shaqyrdy, dep habarlaidy dalanews.kz.
Tramp bul málimdemesin Irlandiiada ótip jatqan Irish Open týrniri kezinde jýrnalisterge aitqan. Onyń sózinshe, Ýkraina Reseidegi basqa nysandarǵa soqqy bere alady, biraq dizel otynyn óndiretin jáne munai óńdeitin nysandarǵa shabýyl jasamaýy kerek.
«Zelenskii bir nárse isteýi kerek – Reseidegi dizel otynyn joiýdy toqtatýy tiis. Basqa nysandarǵa soqqy bersin, biraq dizel otynyna timesin. Óitkeni bul búkil álemge ziianyn tigizip jatyr», – dedi Tramp.
AQSh prezidentiniń aitýynsha, Vashington bul máseleni Ýkraina tarapymen talqylaǵan. Tramp Reseidiń munai óńdeý infraqurylymyna jasalǵan ýkrainalyq soqqylar álemdik naryqtaǵy dizel otynynyń tapshylyǵyna áser etip otyrǵanyn aitty.
Tramptyń málimdemesi álemdik otyn naryǵyndaǵy jaǵdai kúrdelene túsken kezeńde aityldy. AQSh-ta dizel otynynyń ortasha baǵasy alǵash ret gallonyna $6-dan asty. Reuters málimetinshe, Ýkraina kúshteriniń sońǵy ailardaǵy Resei munai óńdeý zaýyttaryna jasaǵan soqqylary eldegi janarmai óndirisiniń qysqarýyna jáne ishki naryqtaǵy tapshylyqqa alyp kelgen.
Ýkraina tarapy Reseidiń munai óńdeý nysandaryn zańdy áskeri nysan dep sanaidy. Kievtiń ustanymynsha, Reseidiń munai-energetika salasy eldiń Ýkrainaǵa qarsy soǵysyn qarjylandyryp ári otynmen qamtamasyz etip otyr. Sonymen qatar Resei áskeri Ýkraina energetikalyq infraqurylymyna turaqty túrde soqqy jasap keledi.
