AQSh prezidenti Donald Tramp Ýkrainadaǵy soǵystyń bastalýyna úsh adam kináli dep sanaidy: Resei prezidenti Vladimir Pýtin, AQSh-tyń burynǵy prezidenti Djo Baiden jáne Ýkraina prezidenti Vladimir Zelenskii. Amerikalyq kóshbasshy bul týraly 14 sáýir, dúisenbi kúni Aq úidegi baspasóz máslihatynda málimdedi, dep habarlaidy Dalanews.kz.
Tramp taǵy da óziniń prezidenttigi tusynda «Pýtinniń Ýkrainaǵa qarsy soǵys týraly oiyna da kirip-shyqpaǵanyn» qaitalap, al ózinen burynǵy prezident Baiden soǵysty «munai baǵasyn tómendetý arqyly» toqtata alatynyn, biraq ony jasamaǵanyn aitty.
«Endi ne isteimiz? Bizde territoriiasynyń 25 paiyzyn jáne eń jaqsy jerlerin joǵaltqan, milliondaǵan adam qaza tapqan el bar... Bul – Baidenniń soǵysy, men ony toqtatýǵa tyrysyp jatyrmyn. Biz bul baǵytta jaqsy jumys isteimiz dep oilaimyn. Osyny júzege asyramyz dep úmittenemin», – dedi ol.
Odan ári AQSh prezidenti Ýkrainadaǵy soǵysqa jol bermeýge bolatynyn, «Baiden de, Zelenskii de ony toqtata alatynyn, al Pýtin soǵysty bastamaýy tiis bolǵanyn» aitty.
«Barlyǵy kináli», – dep túiindedi Tramp.
Osydan keiin Aq úi basshysy «milliondaǵan adamnyń qazasyna úsh adam kináli» degen sózin taǵy bir márte qaitalady.
«Aitaiyqshy, birinshi – Pýtin. Ekinshisi – ne istep jatqanynan múlde habary bolmaǵan Baiden. Úshinshisi – Zelenskii. Al meniń qolymnan keletini – muny toqtatýǵa tyrysý. Men kisi ólimin toqtatqym keledi. Biz bul turǵyda jaqsy jumys istep jatyrmyz dep oilaimyn. Jaqyn arada sizderge óte jaqsy usynystar túsedi dep sanaimyn», – dedi Tramp.
Jýrnalist sondai-aq Tramptyń Sýmy qalasyna jasalǵan soqqy týraly aitqan sózin túsindirýin surap, onyń bul oqiǵany «qatelik» dep ataǵanyn eske saldy. «Qatelik – soǵystyń bastalýyna jol berý edi», – dep jaýap qatty Tramp.
