Donald Tramp pen Si Tszinpin Beijińde kelissóz júrgize bastady. Kezdesý Halyq jinalystarynyń Úlken zalynda ótti, dep habarlaidy dalanews.kz.
Tramp Qytaiǵa sońǵy toǵyz jyldan keiin alǵash ret baryp otyr. Ol Qytaida úsh kún bolyp, sapar aiasynda Qytai basshysymen jeke kezdesý ótkizdi.
Kezdesý barysynda taraptar Qytai Halyq-azattyq armiiasynyń qurmet qaraýylyn tamashalap, áskeri bólimshelerdiń sherýin baqylaǵan.
Kelissóz kezinde Si Tszinpin Qytai men AQSh arasyndaǵy qarym-qatynasqa toqtalyp, eki eldiń seriktes bolýy mańyzdy ekenin aitty.
«Qytai men AQSh qarsylas emes, seriktes bolýy kerek. Eki memleket ortaq jetistik pen órkendeýge birge umtylýy qajet», – dedi Qytai tóraǵasy.
Onyń sózinshe, eki el arasyndaǵy teketires eki tarapqa da ziian keltiredi. Sondyqtan Beijiń ben Vashington básekeles emes, áriptes retinde áreket etýi tiis.
Al Donald Tramp AQSh-tyń Qytaimen saýdany «tolyqtai ózara tiimdi negizde» júrgizetinin málimdedi.
«Sizdiń dosyńyz bolý – men úshin qurmet. Qytai men AQSh arasyndaǵy qarym-qatynas burynǵydan da jaqsy bolady», – dedi Tramp.
Kezdesýden keiin Donald Tramp qysqa úzilis jasaidy dep josparlanǵan. Al keshke Si Tszinpin amerikalyq kóshbasshynyń qurmetine memlekettik banket uiymdastyrady. Qabyldaýǵa Qytai sheneýnikteri, saiasatkerleri jáne iri biznes ókilderi qatysady.
AQSh tarapynan banketke Tramptyń ózi, memlekettik hatshy, prezidenttiń uly men kelini, sondai-aq amerikalyq iri kásipkerler – Ilon Mask, Tim Kýk, NVIDIA basshylyǵy jáne ózge de biznes ókilderi shaqyrylǵan.
Sondai-aq AQSh prezidenti Qytaiǵa álemdegi iri biznes ókilderin ertip kelgenin aityp, bul qadam saýda bailanystaryn damytýǵa baǵyttalǵanyn jetkizdi.
