AQSh pen Resei Federatsiiasy eki eldiń prezidentteri Donald Tramp pen Vladimir Pýtinniń aldaǵy kezdesýiniń ýaqytyn belgilep, ózara kelisim júrgizýde. Ekijaqty kezdesý jaqyn kúnderi ótýi múmkin. Bul týraly Resei Federatsiiasy prezidentiniń kómekshisi Iýrii Ýshakov málimdedi, dep habarlaidy Dalanews.kz.
"Negizinen, amerikalyq taraptyń usynysy boiynsha aldaǵy kúnderi joǵary deńgeidegi ekijaqty kezdesý, iaǵni prezidentter Vladimir Pýtin men Donald Tramptyń kezdesýin ótkizý týraly ýaǵdalastyq ózara kelisildi", dep málimdedi búgin Kremldiń resmi ókili.
Diplomat qazir Resei Federatsiiasynyń biligi amerikalyq áriptesterimen birge osy kezdesýdiń parametrlerin jáne ony ótkizý ornyn naqty zerdeleýge kiriskenin aitty.
"Aitqandai, kezdesý orny da kelisildi, biz bul týraly alda habarlaityn bolamyz", – dedi Iýrii Ýshakov.
Sondai-aq, ol Ýkraina prezidenti Vladimir Zelenskiidiń qatysýymen úshjaqty boljamdy kezdesýine qatysty pikir bildirdi.
"Keshe Vashington, nege ekenin bilmeimin, belgili bir sebeptermen úshjaqty kezdesý týraly aityp qaldy, oǵan keletin bolsaq, bul nusqany Kremldegi kezdesý barysynda amerikalyq ókil jai sóz etken bolatyn, biraq ol naqty talqylanbaǵan jait. Reseilik tarap bul optsiiany tolyǵymen nazardan tys qaldyrýdy jón dep tapty. Biz, eń aldymen, Tramppen ekijaqty kezdesý daiyndyǵyna kóbirek kóńil bólýdi usynamyz. Biz bul kezdesýdiń sátti jáne nátijeli bolýy basty másele dep sanaimyz", dep túsindiredi Iýrii Ýshakov.
Sonymen qatar Kremldiń resmi ókili Vladimir Pýtinniń AQSh prezidentiniń arnaiy ókili Stiven Ýitkoffpen kezdesýine qatysty da túsinikteme bere ketti.
"Bul iskerlik, konstrýktivti kezdesý boldy. Meniń oiymsha, eki tarap ta kelissóz qorytyndysyna qanaǵattanǵan bolýy múmkin. Ýkrainalyq daǵdarysty retteý turǵysynan odan ári birlesken jumystar jaiy qarastyryldy jáne Resei-Amerika qatynastaryn sońǵy jyldardaǵydan múldem basqalai, ózara tiimdi stsenarii boiynsha qurý múmkin ekendigi taǵy da atap ótildi", – deidi Iýrii Ýshakov.
Aita ketsek, Resei Federatsiiasynyń prezidenti keshe, 6 tamyzda AQSh basshysynyń arnaiy ókilin Kremlde qabyldaǵan bolatyn.
