اقش پەن رەسەي فەدەراسياسى ەكى ەلدىڭ پرەزيدەنتتەرى دونالد ترامپ پەن ۆلاديمير ءپۋتيننىڭ الداعى كەزدەسۋىنىڭ ۋاقىتىن بەلگىلەپ، ءوزارا كەلىسىم جۇرگىزۋدە. ەكىجاقتى كەزدەسۋ جاقىن كۇندەرى ءوتۋى مۇمكىن. بۇل تۋرالى رەسەي فەدەراسياسى پرەزيدەنتىنىڭ كومەكشىسى يۋريي ۋشاكوۆ مالىمدەدى، دەپ حابارلايدى Dalanews.kz.
"نەگىزىنەن، امەريكالىق تاراپتىڭ ۇسىنىسى بويىنشا الداعى كۇندەرى جوعارى دەڭگەيدەگى ەكىجاقتى كەزدەسۋ، ياعني پرەزيدەنتتەر ۆلاديمير پۋتين مەن دونالد ترامپتىڭ كەزدەسۋىن وتكىزۋ تۋرالى ۋاعدالاستىق ءوزارا كەلىسىلدى"، دەپ مالىمدەدى بۇگىن كرەملدىڭ رەسمي وكىلى.
ديپلومات ءقازىر رەسەي فەدەراسياسىنىڭ بيلىگى امەريكالىق ارىپتەستەرىمەن بىرگە وسى كەزدەسۋدىڭ پارامەترلەرىن جانە ونى وتكىزۋ ورنىن ناقتى زەردەلەۋگە كىرىسكەنىن ايتتى.
"ايتقانداي، كەزدەسۋ ورنى دا كەلىسىلدى، ءبىز بۇل تۋرالى الدا حابارلايتىن بولامىز"، – دەدى يۋريي ۋشاكوۆ.
سونداي-اق، ول ۋكراينا پرەزيدەنتى ۆلاديمير زەلەنسكييدىڭ قاتىسۋىمەن ءۇشجاقتى بولجامدى كەزدەسۋىنە قاتىستى پىكىر ءبىلدىردى.
"كەشە ۆاشينگتون، نەگە ەكەنىن بىلمەيمىن، بەلگىلى ءبىر سەبەپتەرمەن ءۇشجاقتى كەزدەسۋ تۋرالى ايتىپ قالدى، وعان كەلەتىن بولساق، بۇل نۇسقانى كرەملدەگى كەزدەسۋ بارىسىندا امەريكالىق وكىل جاي ءسوز ەتكەن بولاتىن، ءبىراق ول ناقتى تالقىلانباعان جايت. رەسەيلىك تاراپ بۇل وپسيانى تولىعىمەن نازاردان تىس قالدىرۋدى ءجون دەپ تاپتى. ءبىز، ەڭ الدىمەن، ترامپپەن ەكىجاقتى كەزدەسۋ دايىندىعىنا كوبىرەك كوڭىل ءبولۋدى ۇسىنامىز. ءبىز بۇل كەزدەسۋدىڭ ءساتتى جانە ناتيجەلى بولۋى باستى ماسەلە دەپ سانايمىز"، دەپ تۇسىندىرەدى يۋريي ۋشاكوۆ.
سونىمەن قاتار كرەملدىڭ رەسمي وكىلى ۆلاديمير ءپۋتيننىڭ اقش پرەزيدەنتىنىڭ ارنايى وكىلى ستيۆەن ۋيتكوففپەن كەزدەسۋىنە قاتىستى دا تۇسىنىكتەمە بەرە كەتتى.
"بۇل ىسكەرلىك، كونسترۋكتيۆتى كەزدەسۋ بولدى. مەنىڭ ويىمشا، ەكى تاراپ تا كەلىسسوز قورىتىندىسىنا قاناعاتتانعان بولۋى مۇمكىن. ۋكراينالىق داعدارىستى رەتتەۋ تۇرعىسىنان ودان ءارى بىرلەسكەن جۇمىستار جايى قاراستىرىلدى جانە رەسەي-امەريكا قاتىناستارىن سوڭعى جىلدارداعىدان مۇلدەم باسقالاي، ءوزارا ءتيىمدى سەناريي بويىنشا قۇرۋ مۇمكىن ەكەندىگى تاعى دا اتاپ ءوتىلدى"، – دەيدى يۋريي ۋشاكوۆ.
ايتا كەتسەك، رەسەي فەدەراسياسىنىڭ پرەزيدەنتى كەشە، 6 تامىزدا اقش باسشىسىنىڭ ارنايى وكىلىن كرەملدە قابىلداعان بولاتىن.
