Jýyrda AQSh prezidentin sailaýda jeńiske jetken Donald Tramp kásipker Ilon Maskqa qatysty málimdeme jasap, ol úkimettiń tiimdiligi jónindegi basqarmaǵa jetekshi bolatynyn aitty,- dep habarlaidy Dalanews.kz.
"Kásipkerler Ilon Mask jáne Vivek Ramasvami memlekettik apparatty qysqartyp, qaita qurylymnan ótkizýge jaýapty ýaqytsha qurylǵan jańa mekemege jetekshilik etedi, - dep málimdedi AQSh-tyń jańadan sailanǵan prezidenti Donald Tramp", - dep jazylǵan "Azattyq" dereginde.
Basylym málimetinshe, Tramp eki kásipkerdi memlekettik qyzmette "radikal ózgerister" jasaityn "úkimettiń tiimdiligi jónindegi basqarmanyń" jetekshisi retinde taǵaiyndaǵanyn aitqan.
"Biýrokratiiasy az tiimdirek úkimet qurý Táýelsizdik deklaratsiiasynyń 250 jyldyǵy qarsańynda amerikalyqtarǵa keremet syi bolady", - dep keltirde basylym Donald Tramptyń málimdemesin.
Jańa basqarmanyń maqsat-mindeti - "memlekettik biýrokratiiany joiý, shamadan tys retteýlerdi azaitý, tiimsiz shyǵyndardy qysqartý jáne federaldyq qyzmetterdi qaita qurylymdaý" dep aitylady. Basqarma 2026 jyldyń shildesine deiin óz jumysyn aiaqtaýy kerek.
"SpaceX jáne Tesla kompaniialarynyń negizin qalaýshy Ilon Mask jáne Roivant Sciences dári-dármek kompaniiasynyń negizin qalaýshy Vivek Ramasvani memleket shyǵynyn qysqartyp, memlekettiń ekonomikadaǵy úlesin azaitý tárizdi úndeýlerimen tanylǵan", - dep jazylǵan derekte.
Aita keteiik, buǵan deiin L.N. Gýmilev atyndaǵy Eýraziia ulttyq ýniversiteti Saiasattaný kafedrasynyń meńgerýshisi m.a. Janat Momynqulov Dalanews.kz-ke suhbat berip, AQSh-taǵy sailaý nátijeleri týraly boljam jasady.
"Tramp álemdik saiasatta oiyp turyp oryn alady. Onyń ústine qazirgidei daǵdarys, soǵys jaǵdaiynda onyń is-qimyly - bári óte mańyzdy. Biraq Harris qalǵan jaǵdaida Amerikanyń osy saiasaty jalǵasa beredi. Qytaiǵa, Reseige, Iranǵa qatysty shekteý, tejeý saiasaty júredi.
Meniń oiymsha, Harristiń jeńisine qýanamyz. Al Tramp keletin bolsa, Reseimen qarym-qatynasyndaǵy ózgerister Ortalyq Aziiaǵa, bizge salqyn áser etedi. Bári ainalyp kelgende halyqaralyq júiege áser etedi. Biz boljap bolmaityn oqiǵalar bastalyp ketýi múmkin. Harris Ortalyq Aziiaǵa jańa bir kózqaras tanytýy múmkin, ol - Aq úidiń mańyndaǵy biýrokrattardyń ókili, turaqtylyqtyń "garantiiasy". Al Tramp kelse, Ýkrainadaǵy jaǵdai uzaqqa sozylatyn daýǵa ainalýy múmkin. Sondyqtan, meniń oiymsha, Harristiń kelgeni Qazaqstanǵa tiimdi. Ortalyq Aziiaǵa tikelei áseri bolmasa da, sheshimderi arqyly ainalyp kelgende áseri bolady", - dedi ol.
