AQSh prezidenti Donald Tramp Iranǵa josparlanǵan áskeri shabýyl ýaqytsha toqtatylǵanyn málimdedi. Bul týraly ol óziniń Truth Social áleýmettik jelisindegi paraqshasynda jazdy, dep habarlaidy dalanews.kz.
Tramptyń aitýynsha, Katar ámiri Tamim ben Hamad Ál Táni, Saýd Arabiiasynyń taq murageri Muhammed ben Salman jáne Birikken Arab Ámirlikteriniń prezidenti Muhamed ben Zaid Ál Nahaian AQSh-tan Iranǵa qarsy josparlanǵan áskeri operatsiiany keiinge shegerýdi suraǵan.
Ol Taiaý Shyǵysta qazir mańyzdy kelissózder júrip jatqanyn aityp, atalǵan el basshylary máseleni diplomatiialyq jolmen sheshýge múmkindik bar dep sanaitynyn jetkizdi.
Tramptyń sózinshe, yqtimal kelisim AQSh pen Taiaý Shyǵys elderi úshin tiimdi bolýy kerek. Sonymen qatar ol kelisimniń basty sharttarynyń biri – Iranda iadrolyq qarýdyń bolmaýy ekenin erekshe atap ótti.
«Qurmetti kóshbasshylardyń ótinishin eskere otyryp, men Qorǵanys ministri Pit Hegsetke, Birikken shtab bastyqtary komitetiniń tóraǵasy general Deniel Keinge jáne AQSh áskeri kúshterine erteńge josparlanǵan Iranǵa shabýyldy toqtatý týraly tapsyrma berdim», – dep jazdy Tramp.
Sonymen qatar, ol eger kelissózder nátije bermese, AQSh áskeri aýqymdy operatsiia júrgizýge daiyn bolatynyn da eskertti.
«Eger taraptar qolaily kelisimge kele almasa, Iranǵa qarsy keń kólemdi shabýyl jasaýǵa daiyn bolý jóninde qosymsha nusqaý berildi», – dedi Tramp.
Tramp Iran máselesine qatysty málimdeme jasady
AQSh pen Iran soǵysty toqtatýǵa jaqyn: Qupiia kelisimniń 14 tarmaǵy belgili boldy
