AQSh prezidenti Donald Tramp Irandy eki el arasyndaǵy qaqtyǵystyń bastalýyna jaýapty dep sanaitynyn málimdedi. Onyń aitýynsha, soǵysty Vashington emes, Tegeran bastaǵan, dep habarlaidy dalanews.kz.
Tramp bul týraly dúisenbi kúni Missisipi shtatynda ótken sailaýaldy jiynda aitty.
«Biz Iranmen soǵysty bastaǵan joqpyz. Iran bizge soǵys ashty», – dedi AQSh prezidenti.
Ol Irannyń iadrolyq zymyran jasaýyna eki apta ǵana qalǵanyn taǵy da qaitalady. Tramptyń sózinshe, AQSh-tyń qaqtyǵysqa aralasýdan basqa amaly bolmaǵan.
«Menińshe, bizde tańdaý bolǵan joq. Olarǵa iadrolyq zymyran jasaýǵa eki apta qalǵan edi. Iran álemdegi terrorizmdi qoldaityn basty memleket sanalady», – dedi ol.
Sondai-aq Tramp Iranmen buryn jasalǵan atysty toqtatý týraly kelisimdi ýaqytty bosqa ótkizý dep baǵalady.
«Biz shaǵyn bitimge keldik. Shynymdy aitsam, bul kelisim maǵan eshqashan unaǵan emes. Sypaiylyq tanytýǵa tyrysamyz, biraq meniń túsinýimshe, munyń bári ýaqytty bosqa ótkizý boldy», – dedi AQSh basshysy.
Eske salaiyq, 18 maýsymǵa qaraǵan túni AQSh pen Iran 28 aqpanda bastalǵan qaqtyǵysty toqtatýǵa baǵyttalǵan memorandýmǵa qol qoiǵan edi. Qujatta AQSh-tyń Iranǵa qatysty teńiz blokadasyn alyp tastaýy jáne Tegerannyń Ormuz buǵazyn ashýy qarastyrylǵan.
Alaida keiin eki tarap ta memorandým talaptaryn oryndaýdy toqtatyp, bir-birine qarsy áskeri áreketterin qaita jalǵastyrǵan.
