Elimizdiń jetekshi joǵary oqý orny sanalatyn ál-Farabi atyndaǵy Qazaq ulttyq ýniversitetiniń Ó.A. Joldasbekov atyndaǵy stýdentter saraiy uzaq ýaqyttan beri kóptiń synyna ushyrap keledi. Sebebi mádeni sharalardyń ortalyǵy bolǵan eńseli saraidyń jóndeý jumysy bir jyldan astam ýaqyt boiy sozbalańǵa salynǵan. Búginde alqam-salqamy shyqqan ǵimarattyń syrtqy kelbeti men ishki jaǵdaiy ýniversitet bedeline kóleńke túsirip otyr, dep habarlaidy Dalanews.kz.
Jóndeý jumysy týraly ne belgili?
2024 jyldyń jeltoqsan aiynda saraidyń qasbetiniń bir bóligi alyna bastady. Búginde ǵimarattyń syrty men ishi qańyrap tur.
Al QazUÝ ákimshiligi óz kezeginde ǵimarat tolyqtai qaita qalpyna keltiriletinin málimdedi. Ýniversitettiń baspasóz qyzmetiniń habarlaýynsha, stýdentter saraiy paidalanýǵa berilgennen beri 30 jyl boiy kúrdeli jóndeýden ótpegen, saldarynan ǵimarattyń tehnikalyq jaǵdaiy aitarlyqtai nasharlaǵan.
“2023 jyly akkredittelgen uiym ǵimarattyń tehnikalyq jaǵdaiyn tekserip, tireýish jáne qorshaý konstrýktsiialarynan birqatar aqaý anyqtady. Atap aitqanda, jekelegen temirbeton arqalyqtar men qabyrǵalardyń bolmaýy, tireýish kolonnalardyń tat basýy men qisaiýy, túiisý bólikteriniń buzylýy, shatyr jabyndysy men jylý oqshaýlaý qabatynyń zaqymdanýy baiqaldy. Aqaýlardyń basym bóligi árleý qabattarynyń astynda jasyrylǵan”, — delingen habarlamada.
Baspasóz qyzmeti qoldanystaǵy qurylys normalaryna sáikes, kúrdeli jóndeý jumystary ár 20–25 jyl saiyn júrgizilýi tiis ekenin, alaida bul merzim áldeqashan ótip ketkenin atap ótken. Sonymen qatar, 2024 jylǵy qańtar aiynda Almatyda bolǵan jer silkinisteri ǵimaratqa qosymsha zaqym keltirgen.
“Anyqtalǵan aqaýlar men seismikalyq qaýipterdi eskere otyryp, ýniversitet ǵimarattyń sáýlettik kelbetin saqtai otyryp, onyń konstrýktsiialyq beriktigi men qaýipsizdigin qamtamasyz etý maqsatynda nysandy qaita jańǵyrtý týraly sheshim qabyldady”, — dep málimdedi QazUÝ baspasóz qyzmeti.
Basqarma ókilderiniń aitýynsha, ishki árleý qabattaryn ashpai, aqaýlardy kózben anyqtaý múmkin bolmaǵan.
Ómirbek Joldasbekov atyndaǵy Stýdentter saraiynyń qaita jańǵyrýdan keiingi dizain jobasy qandai bolmaq?
Almaty qalasynyń mádeniet basqarmasynyń pikiri
Buǵan deiin Almaty qalasynyń mádeniet basqarmasy stýdentter saraiynda jóndeý jumystary zańsyz bastalǵanyn málimdegen edi.
Basqarma habarlaýynsha, stýdentter saraiy 2021 jylǵy 17 naýryzdaǵy №1/191 qaýlyǵa sáikes qalalyq mańyzy bar tarihi jáne mádeniet eskertkishteriniń memlekettik tizimine engizilgen (№115).
Basqarma ókilderi QazUÝ tarapynan ǵimaratta ǵylymi-restavratsiialyq jumystar júrgizý týraly ótinish túskenin aitty. Alaida “Tarihi-mádeni mura obektilerin qorǵaý jáne paidalaný týraly” zańnyń 32-babynyń 2-tarmaǵyna sáikes, mundai jumystar **ǵylymi-jobalyq qujattamaǵa sai júrgizilýi tiis”.
“Osyǵan bailanysty basqarma zańnama talaptaryna sáikes ázirlengen ǵylymi-jobalyq qujattamany usyný qajettigi týraly jaýap bergen. Alaida búgingi kúnge deiin tiisti qujattar usynylǵan joq. Zańnyń 37-babyna sáikes, tarihi-mádeni mura obektilerin qorǵaý jáne paidalaný týraly zańnamany buzý zańda belgilengen jaýapkershilikke ákeledi”, — dep habarlady basqarma ókilderi.
QazUÝ tóńiregindegi taǵy bir zańbuzýshylyq
Eske salaiyq, buǵan deiin depýtat Baqytjan Bazarbek jer máselelerindegi sot sheshimderiniń oryndalmaýyna qatysty basty problemalardy ataǵan edi.
Respýblikalyq jer komissiiasy tóraǵasynyń orynbasary, depýtat Baqytjan Bazarbek Qazaqstandaǵy jer máseleleri boiynsha sot sheshimderiniń oryndalmaýyna bailanysty QR Bas prokýrory Berik Asylovqa saýal joldaǵan.
Depýtattyń aitýynsha, sot sheshimderi boiynsha ál-Farabi atyndaǵy QazUÝ mańyndaǵy zańsyz ielengen jer ýchaskesi memleket menshigine qaitarylýy tiis edi, alaida ol jer áli kúnge deiin memleketke berilmegen, al biznes-ortalyq buzylmaǵan.
“Ál-Farabi atyndaǵy QazUÝ mańyndaǵy zańsyz ielengen jer ýchaskesi sot sheshimimen memleket menshigine qaitarylýy kerek edi, al ol jerdegi biznes-ortalyq buzylýy tiis bolatyn. Alaida bul jer áli kúnge deiin memleketke berilmegen, al biznes-ortalyq áli de joiylǵan joq”, — dedi depýtat.
