ەلىمىزدىڭ جەتەكشى جوعارى وقۋ ورنى سانالاتىن ءال-فارابي اتىنداعى قازاق ۇلتتىق ۋنيۆەرسيتەتىنىڭ ءو.ا. جولداسبەكوۆ اتىنداعى ستۋدەنتتەر سارايى ۇزاق ۋاقىتتان بەرى كوپتىڭ سىنىنا ۇشىراپ كەلەدى. سەبەبى مادەني شارالاردىڭ ورتالىعى بولعان ەڭسەلى سارايدىڭ جوندەۋ جۇمىسى ءبىر جىلدان استام ۋاقىت بويى سوزبالاڭعا سالىنعان. بۇگىندە القام-سالقامى شىققان عيماراتتىڭ سىرتقى كەلبەتى مەن ىشكى جاعدايى ۋنيۆەرسيتەت بەدەلىنە كولەڭكە ءتۇسىرىپ وتىر، دەپ حابارلايدى Dalanews.kz.
جوندەۋ جۇمىسى تۋرالى نە بەلگىلى؟
2024 جىلدىڭ جەلتوقسان ايىندا سارايدىڭ قاسبەتىنىڭ ءبىر بولىگى الىنا باستادى. بۇگىندە عيماراتتىڭ سىرتى مەن ءىشى قاڭىراپ تۇر.
ال قازۇۋ اكىمشىلىگى ءوز كەزەگىندە عيمارات تولىقتاي قايتا قالپىنا كەلتىرىلەتىنىن مالىمدەدى. ۋنيۆەرسيتەتتىڭ باسپا ءسوز قىزمەتىنىڭ حابارلاۋىنشا، ستۋدەنتتەر سارايى پايدالانۋعا بەرىلگەننەن بەرى 30 جىل بويى كۇردەلى جوندەۋدەن وتپەگەن، سالدارىنان عيماراتتىڭ تەحنيكالىق جاعدايى ايتارلىقتاي ناشارلاعان.
“2023 جىلى اككرەديتتەلگەن ۇيىم عيماراتتىڭ تەحنيكالىق جاعدايىن تەكسەرىپ، تىرەۋىش جانە قورشاۋ كونسترۋكسيالارىنان ءبىرقاتار اقاۋ انىقتادى. اتاپ ايتقاندا، جەكەلەگەن تەمىربەتون ارقالىقتار مەن قابىرعالاردىڭ بولماۋى، تىرەۋىش كولوننالاردىڭ تات باسۋى مەن قيسايۋى، ءتۇيىسۋ بولىكتەرىنىڭ بۇزىلۋى، شاتىر جابىندىسى مەن جىلۋ وقشاۋلاۋ قاباتىنىڭ زاقىمدانۋى بايقالدى. اقاۋلاردىڭ باسىم بولىگى ارلەۋ قاباتتارىنىڭ استىندا جاسىرىلعان”، — دەلىنگەن حابارلامادا.
باسپا ءسوز قىزمەتى قولدانىستاعى قۇرىلىس نورمالارىنا سايكەس، كۇردەلى جوندەۋ جۇمىستارى ءار 20–25 جىل سايىن جۇرگىزىلۋى ءتيىس ەكەنىن، الايدا بۇل مەرزىم الدەقاشان ءوتىپ كەتكەنىن اتاپ وتكەن. سونىمەن قاتار، 2024 جىلعى قاڭتار ايىندا الماتىدا بولعان جەر سىلكىنىستەرى عيماراتقا قوسىمشا زاقىم كەلتىرگەن.
“انىقتالعان اقاۋلار مەن سەيسميكالىق قاۋىپتەردى ەسكەرە وتىرىپ، ۋنيۆەرسيتەت عيماراتتىڭ ساۋلەتتىك كەلبەتىن ساقتاي وتىرىپ، ونىڭ كونسترۋكسيالىق بەرىكتىگى مەن قاۋىپسىزدىگىن قامتاماسىز ەتۋ ماقساتىندا نىساندى قايتا جاڭعىرتۋ تۋرالى شەشىم قابىلدادى”، — دەپ مالىمدەدى قازۇۋ باسپا ءسوز قىزمەتى.
باسقارما وكىلدەرىنىڭ ايتۋىنشا، ىشكى ارلەۋ قاباتتارىن اشپاي، اقاۋلاردى كوزبەن انىقتاۋ مۇمكىن بولماعان.
ومىربەك جولداسبەكوۆ اتىنداعى ستۋدەنتتەر سارايىنىڭ قايتا جاڭعىرۋدان كەيىنگى ديزاين جوباسى قانداي بولماق؟
الماتى قالاسىنىڭ مادەنيەت باسقارماسىنىڭ پىكىرى
بۇعان دەيىن الماتى قالاسىنىڭ مادەنيەت باسقارماسى ستۋدەنتتەر سارايىندا جوندەۋ جۇمىستارى زاڭسىز باستالعانىن مالىمدەگەن ەدى.
باسقارما حابارلاۋىنشا، ستۋدەنتتەر سارايى 2021 جىلعى 17 ناۋرىزداعى №1/191 قاۋلىعا سايكەس قالالىق ماڭىزى بار تاريحي جانە مادەنيەت ەسكەرتكىشتەرىنىڭ مەملەكەتتىك تىزىمىنە ەنگىزىلگەن (№115).
باسقارما وكىلدەرى قازۇۋ تاراپىنان عيماراتتا عىلىمي-رەستاۆراسيالىق جۇمىستار جۇرگىزۋ تۋرالى ءوتىنىش تۇسكەنىن ايتتى. الايدا “تاريحي-مادەني مۇرا وبەكتىلەرىن قورعاۋ جانە پايدالانۋ تۋرالى” زاڭنىڭ 32-بابىنىڭ 2-تارماعىنا سايكەس، مۇنداي جۇمىستار **عىلىمي-جوبالىق قۇجاتتاماعا ساي جۇرگىزىلۋى ءتيىس”.
“وسىعان بايلانىستى باسقارما زاڭناما تالاپتارىنا سايكەس ازىرلەنگەن عىلىمي-جوبالىق قۇجاتتامانى ۇسىنۋ قاجەتتىگى تۋرالى جاۋاپ بەرگەن. الايدا بۇگىنگى كۇنگە دەيىن ءتيىستى قۇجاتتار ۇسىنىلعان جوق. زاڭنىڭ 37-بابىنا سايكەس، تاريحي-مادەني مۇرا وبەكتىلەرىن قورعاۋ جانە پايدالانۋ تۋرالى زاڭنامانى بۇزۋ زاڭدا بەلگىلەنگەن جاۋاپكەرشىلىككە اكەلەدى”، — دەپ حابارلادى باسقارما وكىلدەرى.
قازۇۋ توڭىرەگىندەگى تاعى ءبىر زاڭبۇزۋشىلىق
ەسكە سالايىق، بۇعان دەيىن دەپۋتات باقىتجان بازاربەك جەر ماسەلەلەرىندەگى سوت شەشىمدەرىنىڭ ورىندالماۋىنا قاتىستى باستى پروبلەمالاردى اتاعان ەدى.
رەسپۋبليكالىق جەر كوميسسياسى ءتوراعاسىنىڭ ورىنباسارى، دەپۋتات باقىتجان بازاربەك قازاقستانداعى جەر ماسەلەلەرى بويىنشا سوت شەشىمدەرىنىڭ ورىندالماۋىنا بايلانىستى ق ر باس پروكۋرورى بەرىك اسىلوۆقا ساۋال جولداعان.
دەپۋتاتتىڭ ايتۋىنشا، سوت شەشىمدەرى بويىنشا ءال-فارابي اتىنداعى قازۇۋ ماڭىنداعى زاڭسىز يەلەنگەن جەر ۋچاسكەسى مەملەكەت مەنشىگىنە قايتارىلۋى ءتيىس ەدى، الايدا ول جەر ءالى كۇنگە دەيىن مەملەكەتكە بەرىلمەگەن، ال بيزنەس-ورتالىق بۇزىلماعان.
“ءال-فارابي اتىنداعى قازۇۋ ماڭىنداعى زاڭسىز يەلەنگەن جەر ۋچاسكەسى سوت شەشىمىمەن مەملەكەت مەنشىگىنە قايتارىلۋى كەرەك ەدى، ال ول جەردەگى بيزنەس-ورتالىق بۇزىلۋى ءتيىس بولاتىن. الايدا بۇل جەر ءالى كۇنگە دەيىن مەملەكەتكە بەرىلمەگەن، ال بيزنەس-ورتالىق ءالى دە جويىلعان جوق”، — دەدى دەپۋتات.
