Túrkistan oblysy ákiminiń orynbasary Ermek Kenjehanuly Ordabasy aýdanynyń ákimi Azat Oralbaevpen birge Tórtkúl aýyldyq okrýgindegi maqta óńdeýmen aınalysatyn «Ramazan Agro» jáne «Nur Agro 73» JSHS-ne baryp, óndiris barysymen tanysty, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Jaýapty tulǵalar aýdandaǵy maqta alqabyn aralap, ónim óndirýshilermen jáne zaýyt basshylyǵymen salalyq óndiristegi máseleler boıynsha pikirlesti.

«Ramazan Agro» JSHS maqtanyń «Karlo», «Edessa», «AV 440», «AV 010», «Lazer» jáne «Lınza» sıaqty týrkıalyq 6 túrli sortyn egedi.

Zaýyt basshylary bıyl 723 gektar alqaptan boljam boıynsha 2700 tonna ónim jınaýdy josparlap otyrǵandaryn jetkizdi.

Al «Nur Agro 73» JSHS maqta qabyldaý jáne óńdeý zaýytynyń dırektory Nurlan Batyrbekov oblys ákiminiń agrarlyq salaǵa jaýapty orynbasaryna kúzgi maqta jınaý barysy týraly baıandady.

Kezdesý barysynda zaýyt basshysy atalǵan mekemede jylyna 30000 tonna maqta óńdelip, daıyn ónimdi Chehıa jáne Kanada memleketterine eksporttaýdy josparlap otyrǵanyn jetkizdi.

Aıta keteıik, atalǵan maqta óńdeý zaýyty 300 adamdy maýsymdyq jumyspen qamtyp otyr.