Tórt túlik qystan qysylmai shyqty
Osyǵan bailanysty, Shý aýdanynda mal tóldetý naýqany qalai júrip jatqanyn baiqap kórgen edik. Máselen, aýdan ortalyǵynan shalǵai ornalasqan Kókqainar aýyldyq okrýgindegi «Yntymaq» sharýa qojalyǵy naýqandyq jumysty aiaqtap ta qalypty. Sharýashylyq jetekshisi Qyrǵyzbai Baimuhanbet 100 saýlyqtan 100 qozy dep jospar qurmasa da, qystaqtaǵy qoradan óretin tórt túliktiń basyn kókke jetkizip, shyǵynsyz tól alýdyń qamymen júrgenderin aitady.
–«Yntymaq» sharýa qojalyǵynda osydan 20 jyl buryn nebári 35 bas ýaq mal bolsa, búginde 900 bas qoi, 150 bas siyr jáne 50 bas jylqy bar. Oǵan qosa, maldy asyldandyrýmen ainalysýdy qolǵa aldyq. Qazir mal bordaqylaýǵa arnalǵan shaǵyn alańymyz da jumys istep tur. Sharýashylyqta uzaq jyldan beri eńbek etip kele jatqan 16 adamnyń 4-ýi saqmanshy, 2-ýi malshy jáne 10 mehanizator bar. Qystaqtaǵy naýqandyq jumys naýryz aiynyń basynan bastalyp ketti. Shúkir, tórt túlik qystan qysylmai shyqty. Jem-shóp te tolyq jetip, maldyń qońdylyǵy saqtaldy. Al, mal tóldetýdiń mashaqatyn malshylardan artyq eshkim bile qoimas. Ásirese, túnde saqmanshylardyń eń saq bolatyn sáti. Olar ár 2-3 saǵat saiyn qoradaǵy qoidy aralap, jańa týǵan mal keziger bolsa qozylaryn bólip otyrady. Óriste týǵanyn ózimen alyp keledi. Onyń ústine, sharýashylyqta qoidan bólek, tórt túlikti túgel órgizip otyrǵandyqtan, mal tóldetý barlyǵymyz úshin óte qaýyrt naýqan bolyp tur. Dál qazir qoiy qozdap, biesi qulyndap, siyry buzaýlap jatqan malshy qaýymnyń bir sátke de demalýǵa murshasy joq, - deidi ol.
Jalpy, sharýashylyqtaǵy 900 bas qoidyń 700-i ǵana týady eken. Qazirgi kezde ýaq maldyń barlyǵy derlik tóldep úlgergen. Sondai-aq, siyr men jylqynyń da teń jartysy tóldepti. Sharýalar sátin salsa, sáýir aiynyń sońyna qarai mal tóldetý naýqany túgeldei aiaqtalady dep josparlap otyr. Odan keiin sharýashylyqtaǵy tórt túlikti jailaýǵa kóshirýdiń qamy bastalmaq. Ol jerde malshylardy qyryqtyq pen veterinarlyq jumystardy júrgizý syndy úlken naýqan kútip tur.
