وسىعان بايلانىستى، شۋ اۋدانىندا مال تولدەتۋ ناۋقانى قالاي ءجۇرىپ جاتقانىن بايقاپ كورگەن ەدىك. ماسەلەن، اۋدان ورتالىعىنان شالعاي ورنالاسقان كوكقاينار اۋىلدىق وكرۋگىندەگى «ىنتىماق» شارۋا قوجالىعى ناۋقاندىق جۇمىستى اياقتاپ تا قالىپتى. شارۋاشىلىق جەتەكشىسى قىرعىزباي بايمۇحانبەت 100 ساۋلىقتان 100 قوزى دەپ جوسپار قۇرماسا دا، قىستاقتاعى قورادان ورەتىن ءتورت تۇلىكتىڭ باسىن كوككە جەتكىزىپ، شىعىنسىز ءتول الۋدىڭ قامىمەن جۇرگەندەرىن ايتادى.
–«ىنتىماق» شارۋا قوجالىعىندا وسىدان 20 جىل بۇرىن نەبارى 35 باس ۋاق مال بولسا، بۇگىندە 900 باس قوي، 150 باس سيىر جانە 50 باس جىلقى بار. وعان قوسا، مالدى اسىلداندىرۋمەن اينالىسۋدى قولعا الدىق. ءقازىر مال بورداقىلاۋعا ارنالعان شاعىن الاڭىمىز دا جۇمىس ىستەپ تۇر. شارۋاشىلىقتا ۇزاق جىلدان بەرى ەڭبەك ەتىپ كەلە جاتقان 16 ادامنىڭ 4ء-ۋى ساقمانشى، 2ء-ۋى مالشى جانە 10 مەحانيزاتور بار. قىستاقتاعى ناۋقاندىق جۇمىس ناۋرىز ايىنىڭ باسىنان باستالىپ كەتتى. شۇكىر، ءتورت تۇلىك قىستان قىسىلماي شىقتى. جەم-شوپ تە تولىق جەتىپ، مالدىڭ قوڭدىلىعى ساقتالدى. ال، مال تولدەتۋدىڭ ماشاقاتىن مالشىلاردان ارتىق ەشكىم بىلە قويماس. اسىرەسە، تۇندە ساقمانشىلاردىڭ ەڭ ساق بولاتىن ءساتى. ولار ءار 2-3 ساعات سايىن قوراداعى قويدى ارالاپ، جاڭا تۋعان مال كەزىگەر بولسا قوزىلارىن ءبولىپ وتىرادى. ورىستە تۋعانىن وزىمەن الىپ كەلەدى. ونىڭ ۇستىنە، شارۋاشىلىقتا قويدان بولەك، ءتورت تۇلىكتى تۇگەل ورگىزىپ وتىرعاندىقتان، مال تولدەتۋ بارلىعىمىز ءۇشىن وتە قاۋىرت ناۋقان بولىپ تۇر. ءدال ءقازىر قويى قوزداپ، بيەسى قۇلىنداپ، سيىرى بۇزاۋلاپ جاتقان مالشى قاۋىمنىڭ ءبىر ساتكە دە دەمالۋعا مۇرشاسى جوق، - دەيدى ول.
جالپى، شارۋاشىلىقتاعى 900 باس قويدىڭ 700ء-ى عانا تۋادى ەكەن. قازىرگى كەزدە ۋاق مالدىڭ بارلىعى دەرلىك تولدەپ ۇلگەرگەن. سونداي-اق، سيىر مەن جىلقىنىڭ دا تەڭ جارتىسى تولدەپتى. شارۋالار ءساتىن سالسا، ءساۋىر ايىنىڭ سوڭىنا قاراي مال تولدەتۋ ناۋقانى تۇگەلدەي اياقتالادى دەپ جوسپارلاپ وتىر. ودان كەيىن شارۋاشىلىقتاعى ءتورت تۇلىكتى جايلاۋعا كوشىرۋدىڭ قامى باستالماق. ول جەردە مالشىلاردى قىرىقتىق پەن ۆەتەرينارلىق جۇمىستاردى جۇرگىزۋ سىندى ۇلكەن ناۋقان كۇتىپ تۇر.
