Tórt jyldan keiin saqshylardyń ashý-yzasyn týdyrǵan video
Iá, árkim árbir oqiǵany ózinshe tápsirleidi. Quqyq qorǵaý organdary osydan tórt jyl buryn Kentaldyń politsiia qyzmetkeriniń formasynda túsirilgen videosy tutas tártip saqshylarynyń ar-namysyna tigenin aityp, tergeýdiń astyna alyp, aiyppul tóletti.
Osy jaittan quqyq qorǵaý organdary úshin kez kelgen is ýaqyt aǵymyna ilesip, izim-ǵaiym joǵalyp ketpeitinin baiqadyq.
Iá, kez kelgen adam jasaǵan qateligi, qylmysy úshin zań oryndaryna jaýap berýi tiis. Onyń ústine, qazirgi tańda halyq arasynda quqyq qorǵaý organdarynyń bedeli betegeden biik, jýsannan alasa bolyp turǵan sátte Kentaldyń tórt jyl buryn túsirilgen videosy áleýmettik jelige jarq etip shyǵyp, quqyq qorǵaý organdary basshylarynyń ashý-yzasyn týǵyzǵanyn túsinemiz.
Osy rette quqyq qorǵaý organdary tórt jyl buryn qaida qarap otyrdy degen saýal týyndaidy. Sonda olar áleýmettik jeli qaramai ma? Buǵan tipti sengiń kelmeidi. Osydan tórt jyl buryn da Qazaqstan politsiiasynyń qalyń buqara aldyndaǵy bedeli kermet bolyp turmaǵany anyq. Áiteýir Kentaldyń videosy quqyq qorǵaý organdarynyń bir basshysynyń kózine túsip (kesh te bolsa) ashý-yzasyn týǵyzǵany anyq.
Tyrnaq astynan kir izdeý me, álde...
Ekinshi oqiǵa da osydan tórt jyl buryn oryn alǵanyn jurtshylyq jaqsy biledi. Áleýmettik Medsaqtandyrý qory eks-tóraǵasy Aibatyr Jumaǵulovtyń zaiyby tórt jyl buryn óziniń áleýmettik jelidegi paraqshasynda biznes salasynda tabysty jumys istegen kúieýi 30 jasqa deiin 10 ret kóligin jańartyp berem degen ýádesinde turǵanyn kópshilikpen bólisip, jazyq jerde súrindi. Arada tórt jyl ótkende álgi video jýrnalist Gúlbaný Ábenovanyń nazaryna iligip, úlken daýǵa tamyzyq boldy.
Qazirgidei karantin kezinde ózi kúnin áreń kórip júrgen halyq muny oqyǵannan keiin qandai kúide bolǵanyn áleýmettik jelidegi kommentariilerden anyq ańǵarýǵa bolady.
Bildei el betine qarap otyrǵan Memlekettik áleýmettik meditsinalyq saqtandyrý qory tóraǵasynyń kelinshegi myńdaǵan oqyrmany bar paraqshasyna mundai dúnieni qalai ǵana bólisti eken. Árine, qýanyshy qoinyna syimai jazǵany anyq.
Daý ýshyqqan kezde Aibatyr Jumaǵulovtyń ózi túsinikteme berip, zaiybyna kólikti bizneste júrgen kezinde alyp bergenin, ózi sekildi tabysker azamat úshin qalypty dúnie ekenin aitty. Tórt jyl burynǵy jazbany jerden jeti qoian tapqandai jańalyq etip jazǵan Gúlbaný Ábenovanyń is-áreketin tyrnaq astynan kir izdeý dep baǵalaǵanyn oqydyq.
Aibatyr myrzanyń túsinigine salsaq, tórt jyl burynǵy kelinsheginiń jazbasyn sóz qylýǵa bolmaitynyn ańǵarýǵa bolady. Biraq halyqtyń áleýmettik jelidegi jazbalary men kommentariilerin oqysańyz, olardyń basqasha oilaitynyn baiqaisyz.
Ádilin kim aitady?
Kez kelgen jaýapty qyzmette otyrǵan sheneýniktiń jeke basyndaǵy jaǵdaiy men onyń qaltasyndaǵy aqshasyna qatysty halyqtyń áńgime qylýǵa qaqysy bar. Óitkeni kez kelgen sheneýniktiń is-áreketi halyqtyń ómirine áser etedi. Halyq oǵan qyrýar qarjysyn amanattap tapsyrdy. Bul Aiekeń aitqandai, tyrnaq astynan kir izdeý emes.
Qazaqstanda ǵana emes, damyǵan Batys elderinde de shendiler men biznesmender árbir basy artyq tiyny úshin jaýap beredi. Muny bizdiń shendiler jaqsy bilýi kerek.
Osy eki oqiǵadan elimiz úlken daǵdarysta ekenin baiqaýǵa bolady. Tórt jyl burynǵy video úshin ánshi tergep, tekserilip, sońynda aiyp tóledi. Al el úmit artqan qordyń burynǵy tóraǵasy kelinsheginiń tórt jyl burynǵy jazbasyna súienip, másele kóterýdi tyrnaq astynan kir izdeý dep baǵalady.
Sonda ádildik qaida? Ádildik saltanat qurmaǵan soń, biz osyndai daǵdarysty jaǵdaiǵa tap bolǵanymyz anyq. Sizder qalai oilaisyzdar?
Jarbol KENTULY
