Qaraǵandyda ǵylym, bilim, mádeniet, media jáne qoǵamdyq ortada júrgen belsendi jastardyń qatysýymen Qazaqstan Respýblikasy Prezidenti Qasym-Jomart Toqaevtyń «Ádiletti qoǵamǵa – shynshyl sóz» jinaǵyn talqylaýǵa arnalǵan jiyn ótti, dep habarlaidy dalanews.kz.
Basqosýda Memleket basshysynyń ár kezeńde aitqan oi-tujyrymdarynyń búgingi reformalarmen sabaqtastyǵy sóz boldy. Qatysýshylar jinaqta qamtylǵan qundylyqtardyń qazirgi qoǵamdaǵy ornyn talqylap, olardyń jas býynǵa berer taǵylymyna toqtaldy.
Jinaqqa Prezidenttiń ótken ǵasyrdyń 90-jyldarynan bastap ár jyldary aitqan oi-pikirleri engizilgen. Máselen, 1995 jyly «Parasat» jýrnalyna bergen suhbatynda Qasym-Jomart Toqaev «Kez kelgen problemanyń sheshimi – adamdarda» degen pikir bildirgen. Búginde adam kapitaly memlekettik saiasattyń strategiialyq basymdyqtarynyń birine ainalyp otyr.
«Kezinde memleket basshysy: «Ádilet joly – aýyr jol, biraq aýyr bolsa da, odan týra jol joq», – degen edi. Búginde ÁDILET uǵymy saiasi, ekonomikalyq jáne áleýmettik reformalardyń ózegine ainaldy. Bul mysal jyldar boiy qalyptasqan ustanymnyń aýqymdy saiasi reformalarǵa ulasqanyn aishyqtaidy. 90-shy jyldary Adam, Ádilet, Jaýapkershilik, Bilim, Kásibilik, Memleket múddesi týraly kózqarasyn ashyq aitqan Prezidenttiń bul oilary ýaqyt synynan ótip, búginde memlekettik saiasattyń ózegine ainaldy», - dedi Qaraǵandy oblysy ákiminiń orynbasary Álibek Áldenei.
Jiynda ádebiettiń qoǵamdyq oiǵa yqpaly, tarihtan taǵylym alý, el birligi men ortaq qundylyqtar, Konstitýtsiia jáne azamattyq jaýapkershilik, ǵylym men bilimniń el damýyndaǵy róli keńinen talqylandy. Sondai-aq qazaq tilin jańa bilim men tehnologiianyń tiline ainaldyrý, jasandy intellektini qoǵam igiligine paidalaný, jastardyń bilimi men eńbegi, azamattyq ustanymy jáne aqparat keńistigindegi shynshyldyq máseleleri kóterildi.
Qatysýshylardyń pikirinshe, ádiletti qoǵam qalyptastyrý – tek memlekettiń emes, ár azamattyń ortaq mindeti. Adal eńbek, bilim men bilik, azamattyq jaýapkershilik jáne el men jerge degen janashyrlyq qoǵam damýynyń mańyzdy negizderi bolyp qala beredi.
Jiyn sońynda jastarǵa arnalǵan jańa kitaphana ashyldy. Ortalyqta qazaq ádebieti men álem ádebietiniń shyǵarmalary jinaqtalǵan. Kitaphana oqyrmandardyń kitap oqyp, bilimin tolyqtyrýyna múmkindik berýmen qatar, erkin pikir almasyp, jańa ideialardy talqylaityn kovorking alańy retinde de qyzmet atqarady.
