Qazaqstanda saiasi reformalar óz jalǵastyǵyn tabýda. Qoǵamnyń bir bóligi buǵan áli de kúmánmen qaraǵanymen, sarapshylar naqty ári aiqyn ózgeristerdi baiqap otyrǵanyn aitady. Saiasattanýshy Andrei Chebotarevtiń pikirinshe, prezident Qasym-Jomart Toqaevtyń bastamalary basqarý júiesin birtindep ári dáiekti túrde transformatsiialaý kezeńine ainaldyrdy, dep habarlaidy Dalanews.kz kursiv.media-ǵa silteme jasap.
Sarapshynyń aitýynsha, reformanyń basty baǵyttary demokratiialyq institýttardy nyǵaitýdy, biliktiń ashyqtyǵyn arttyrýdy jáne azamattyq quqyqtardy keńeitýdi qamtidy. 2022 jyly Konstitýtsiiaǵa 64 túzetý engizilip, 39 bap ózgertilgen bolatyn. Negizgi ózgerister bilik tarmaqtary arasyndaǵy ókilettikterdi qaita bólýdi kózdedi: parlamenttiń yqpaly kúsheiip, prezidenttiń biligi shekteldi, al sot júiesi kóbirek derbestik aldy.
Bul úrdis 2023–2025 jyldary da jalǵasyn tapty. Sailaý rásimderi naqtylanyp, azamattardyń sheshim qabyldaý protsesterine qatysý múmkindikteri keńeitildi. Chebotarevtiń aitýynsha, munyń bári memlekettik basqarýdy demokratiialandyrýǵa jáne bilik arasyndaǵy jańa tepe-teńdikti qalyptastyrýǵa baǵyttalǵan.
Ol qoǵamda áli de naqty ári tez ózgeristerge degen suranystyń saqtalyp otyrǵanyn moiyndaidy.
"Kópshilik ózgeristerdi áli sezinbeýi múmkin, sebebi olar jaǵdaidy tutas emes, jekelegen bólikter arqyly baǵalaidy", – deidi saiasattanýshy.
Alaida Chebotarevtiń pikirinshe, keńirek qarasaq, ózgeristerdiń kóptegen salany qamtyp otyrǵany baiqalady. Qazirgi bilik kúrdeli máselelerdi ashyq moiyndap, olardy sheshýge qoǵam ókilderin tartyp otyr. Bul burynǵy tuiyq modelden aiqyn aiyrmashylyǵy bar jańa tásil ekenin tanytady.
Reformalar boiynsha talqylaýlar QR Prezidenti janyndaǵy Ulttyq quryltai men QR Parlamenti Májilisi janyndaǵy Qoǵamdyq palata alańdarynda júrip jatyr. Bul qurylymdar ózekti máselelerdi ashyq talqylap, bilik pen qoǵam arasyndaǵy bailanysty kúsheitýge arnalǵan tiimdi arnaǵa ainaldy.
"Memleket basshysy Qasym-Jomart Toqaevtyń saiasi, áleýmettik-ekonomikalyq reformalardy kezeń-kezeńimen, birtindep júzege asyrýǵa baǵyttalǵan resmi ustanymyn eń ońtaily jol dep baǵalaimyz", – deidi Chebotarev.
Sonymen birge ol "eski Qazaqstannan" qalǵan keibir problemalardyń áli de ózekti ekenin atap ótti. Degenmen, onyń aitýynsha, bul máselelerdi biliktiń ashyq moiyndaýy men qoǵammen talqylaýynyń ózi jańa saiasi mádeniettiń bir kórinisi bolyp tabylady.
