- Eger fılmdi tolyq qarap shyqsańyz, onda, negizginen Ýkraına týraly sóz bolyp jatqanyn ańǵarýǵa bolady. Shamasy, eldiń ataýyn tikeleı atamaý kerek bolǵandyqtan, kóptik maǵynada ol aıtyla bastady, sodan keıin de basqa postkeńestik respýblıkalardyń árqaısysy muny ózine qatystyryp oılap alyp jatqan sekildi.
Biraq sol suqbattan keıin baspasóz hatshysy bul aıtylǵan nársege qatysty dereý túsinikteme berip, bir túsinbestiktiń aldyn aldy. Ol Reseıdiń eshbir respýblıkaǵa terıtorıalyq máselede eshqandaı kinárat taǵyp, talap qoımaıtynyn kesip aıtty.
İs júzinde Prezıdentter de adam balasy, suqbat bergende oıyn sátsiz jetkizip qalatyn kezi bolady, ondaıda baspasóz hatshysy ony túzep, qoǵamdaǵy túsinbestiń aldyn alady. Bul qarapaıym praktıka. Jalpy, ol fılmde Ýkraına týraly aıtylyp jatqany anyq, - dep jazdy Qudaıbergenov Facebook-tegi paraqshasynda.
Ol Qazaqstannyń geografıalyq jaǵdaıy Ýkraınaǵa qaraǵanda ózgeshe ekenin, sondyqtan Reseı terıtorıalyq máselede bizge eshqandaı kinárat taǵyp, talap qoıa almaıtynyn aıtty. Máselen, bizde Qara teńiz floty sıaqty daýly strategıalyq nysandar joq.
- Tipti, Reseı tarapynan terıtorıalyq máselege qatysty qandaı da bir daý kóterip jatsa, olar ádette salmaǵy joq saıasat sahnasyndaǵy qoıylymdy "oınaýshylar" nemese marıgınaldar bolyp keledi, al olarǵa sózdi de, ýaqytty da shyǵyndap qajeti joq, - deıdi ol.
"Reseı. Kreml. Pýtın" fılminde Vladımır Pýtın konstıtýsıaǵa engizilgen ózgertýlerge túsinik bere otyryp, KSRO respýblıkalarynyń odaq quramynan shyǵýǵa quqyǵy bar bolǵanyn, alaıda ol odaqtyq kelisimde kórsetilmegenin aıtqan.
- Keńes Odaǵy qurylǵan kezde odan shyǵý quqyǵy da belgilendi, biraq onyń tártibi qujatta belgilenbegendikten, ózdiginen bul arada mynandaı másele týyndaıdy: eger belgili bir respýblıka Keńes Odaǵynyń quramyna kirse, odan soń orystardyń syıyn qosa ıelense, mysaly dástúrli, tarıhı terıtorıalaryn, orys aýmaqtaryn degendeı, odan keıin odaqtan shyǵý týraly sheshim qabyldasa ne bolady? Onda kelgen kezde qandaı, sondaı kúımen ketýi kerek qoı, orys halqy syıyn qosa ala ketpeı, - dedi sóz talqyda Pýtın.
Kelesi kúni Pýtınniń baspasóz hatshysy Dmıtrıı Peskov Reseıdiń kórshi memleketterge qatysty eshqandaı terıtorıalyq talaptary joq ekenin aıtty.
