Astanada Prezident Qasym-Jomart Toqaevtyń ákimdermen ótkizgen keńeitilgen jiyny jergilikti basqarý júiesine qatysty mańyzdy suraqtardy kún tártibine shyǵardy. Osy kezdesýdiń mán-mańyzyn túsiný úshin Dalanews.kz agenttigi saiasattanýshy Talǵat Qalievtiń pikirin surap bildi.
Sarapshynyń aitýynsha, bul jiynnyń basty maqsaty "aýyl ákimderin tikelei sailaý reformasynyń" nátijelerin taldaý.
Sózinshe, aýyl ákimderin sailaý engizilgeli biraz ýaqyt ótti. Sol sebepti Prezident reformanyń qalai júzege asyp jatqanyn, qandai nátijeler bergenin óz kózimen baǵalaýdy jón kórgen.
“Prezident ákimderdiń sapasy qandai, halyq senimi qalai ózgerdi – osynyń bárin baǵalaý úshin jinaldy. Óitkeni bul – mańyzdy reforma. Onyń tiimdi jumys istep jatqanyn naqty talqylap kórý kerek”, – deidi saiasattanýshy.
Talǵat Qalievtiń pikirinshe, aýyl ákimderin tikelei sailaý qoǵam úshin tiimdi format.
“Aýyl turǵyndary óz ákimderin jaqsy biledi. Sol sebepti olar jaýapkershilikpen daýys beredi. Ákimder de kún saiyn halyqtyń aldynda. Kez kelgen suraqqa sol jerde jaýap berýge mindetti. Sondyqtan jergilikti deńgeidegi jumys aitarlyqtai jandandy”, – dep atap ótti sarapshy.
Sarapshynyń aitýynsha, ákim men sailaýshy arasyndaǵy tikelei bailanys aýyldaǵy turmys sapasynyń jaqsarýyna da oń áser etip otyr.
Sonymen qatar keiingi ýaqytta aýdan ákimderin sailaý júiesin qaita qaraý týraly másele jii talqylanyp keledi. Talǵat Qaliev bul taqyryp jiynda da kóterilgen bolýy múmkin ekenin aitady.
“Aýdan ákiminiń halyqqa bergen ýádesi men oblystyq saiasattyń arasynda sáikessizdik bolýy yqtimal. Sailaýda tájiribesiz adamdar ótip ketse, búkil aýdan zardap shegedi. Aýdan deńgeiinde biýdjettik saiasat kúrdelirek, sondyqtan basqarý sapasy asa mańyzdy”, - dep atap ótti ol.
Aitýynsha, aldaǵy ýaqytta aýdan ákimderin sailaý toqtatylýy da yqtimal.
“Bul máseleni Prezident qaraýdy tapsyrǵan. Eger sheshim qabyldansa, bolashaqta tek aýyl ákimderi men oblys ákimderi taǵaiyndalýy múmkin”, – deidi Talǵat Qaliev.
Saiasattanýshynyń pikirinshe, Prezidenttiń ákimdermen kezdesýi – jergilikti basqarý júiesin jetildirý maqsatyndaǵy mańyzdy qadam. Aýyl ákimderiniń jumysy oń baǵalansa, aýdan deńgeiindegi basqarý modeli ózgerýi múmkin.
Dalanews.kz aldaǵy saiasi reformalarǵa qatysty aqparattardy nazarda ustaidy.
Toqaev jiynda ne dedi?
Aita keteiik, buǵan deiin Prezident Qasym-Jomart Toqaev aýyl ákimderiniń dialog platformasynda sóz sóilegen edi.
Memleket basshysy aýdan ákimin sailaýdyń tiimdi-tiimsiz tustaryn muqiiat saralaýdy tapsyrdy.
"Aýdan ákimderin sailaýǵa qatysty ártúrli kózqaras bar. Birqatar qoǵam qairatkeri men belsendi azamattar "aýdan ákimderin sailaý qajet pe, joq pa" degen máseleni qaita qaraýdy usynyp otyr. Bul máseleni Erlan Sairov, Albert Raý, Marhabat Jaiymbetov bastaǵan depýtattar da kóterdi. Olar elde sailaý tym kóbeiip bara jatqanyn, jurt saiasi naýqandardan mezi bola bastaǵanyn aityp otyr. Bul pikirdi aýyl jáne aýdan turǵyndary da qoldap jatyr. Sailaý naýqandary jergilikti jerde júrgizilýge tiis naqty jumystarǵa kedergi keltirýi múmkin degen paiymdar da bar. Bul pikirlerdi eskergen jón", - dedi Prezident.
Buǵan deiin aýdan ákimderin sailaý tásili arqyly 52 ákim sailanǵan.
"Endi olardyń qalai jumys isteitinin qarap kórý qajet. Aýdan ákimin sailaýdyń tiimdi-tiimsiz tustaryn muqiiat saralaý kerek. Másele aýdan ákimderiniń sailaýyn mindetti túrde ótkizý emes, basty maqsat: biz oń nátijelerge qol jetkizýimiz kerek. Úkimet jáne Parlament depýtattary birlesip, osy máseleni jan-jaqty qarap, ádiletti, durys sheshim qabyldaýy qajet. Eń bastysy, árbir reforma salmaqty kózqaraspen, baiyppen jasalýy kerek", - dedi Toqaev.
