استانادا پرەزيدەنت قاسىم-جومارت توقايەۆتىڭ اكىمدەرمەن وتكىزگەن كەڭەيتىلگەن جيىنى جەرگىلىكتى باسقارۋ جۇيەسىنە قاتىستى ماڭىزدى سۇراقتاردى كۇن تارتىبىنە شىعاردى. وسى كەزدەسۋدىڭ ءمان-ماڭىزىن ءتۇسىنۋ ءۇشىن Dalanews.kz اگەنتتىگى ساياساتتانۋشى تالعات قالييەۆتىڭ پىكىرىن سۇراپ ءبىلدى.
ساراپشىنىڭ ايتۋىنشا، بۇل جيىننىڭ باستى ماقساتى "اۋىل اكىمدەرىن تىكەلەي سايلاۋ رەفورماسىنىڭ" ناتيجەلەرىن تالداۋ.
سوزىنشە، اۋىل اكىمدەرىن سايلاۋ ەنگىزىلگەلى ءبىراز ۋاقىت ءوتتى. سول سەبەپتى پرەزيدەنت رەفورمانىڭ قالاي جۇزەگە اسىپ جاتقانىن، قانداي ناتيجەلەر بەرگەنىن ءوز كوزىمەن باعالاۋدى ءجون كورگەن.
“پرەزيدەنت اكىمدەردىڭ ساپاسى قانداي، حالىق سەنىمى قالاي وزگەردى – وسىنىڭ ءبارىن باعالاۋ ءۇشىن جينالدى. ويتكەنى بۇل – ماڭىزدى رەفورما. ونىڭ ءتيىمدى جۇمىس ىستەپ جاتقانىن ناقتى تالقىلاپ كورۋ كەرەك”، – دەيدى ساياساتتانۋشى.
تالعات قالييەۆتىڭ پىكىرىنشە، اۋىل اكىمدەرىن تىكەلەي سايلاۋ قوعام ءۇشىن ءتيىمدى فورمات.
“اۋىل تۇرعىندارى ءوز اكىمدەرىن جاقسى بىلەدى. سول سەبەپتى ولار جاۋاپكەرشىلىكپەن داۋىس بەرەدى. اكىمدەر دە كۇن سايىن حالىقتىڭ الدىندا. كەز كەلگەن سۇراققا سول جەردە جاۋاپ بەرۋگە مىندەتتى. سوندىقتان جەرگىلىكتى دەڭگەيدەگى جۇمىس ايتارلىقتاي جانداندى”، – دەپ اتاپ ءوتتى ساراپشى.
ساراپشىنىڭ ايتۋىنشا، اكىم مەن سايلاۋشى اراسىنداعى تىكەلەي بايلانىس اۋىلداعى تۇرمىس ساپاسىنىڭ جاقسارۋىنا دا وڭ اسەر ەتىپ وتىر.
سونىمەن قاتار كەيىنگى ۋاقىتتا اۋدان اكىمدەرىن سايلاۋ جۇيەسىن قايتا قاراۋ تۋرالى ماسەلە ءجيى تالقىلانىپ كەلەدى. تالعات قالييەۆ بۇل تاقىرىپ جيىندا دا كوتەرىلگەن بولۋى مۇمكىن ەكەنىن ايتادى.
“اۋدان اكىمىنىڭ حالىققا بەرگەن ۋادەسى مەن وبلىستىق ساياساتتىڭ اراسىندا سايكەسسىزدىك بولۋى ىقتيمال. سايلاۋدا تاجىريبەسىز ادامدار ءوتىپ كەتسە، بۇكىل اۋدان زارداپ شەگەدى. اۋدان دەڭگەيىندە بيۋدجەتتىك ساياسات كۇردەلىرەك، سوندىقتان باسقارۋ ساپاسى اسا ماڭىزدى”، - دەپ اتاپ ءوتتى ول.
ايتۋىنشا، الداعى ۋاقىتتا اۋدان اكىمدەرىن سايلاۋ توقتاتىلۋى دا ىقتيمال.
“بۇل ماسەلەنى پرەزيدەنت قاراۋدى تاپسىرعان. ەگەر شەشىم قابىلدانسا، بولاشاقتا تەك اۋىل اكىمدەرى مەن وبلىس اكىمدەرى تاعايىندالۋى مۇمكىن”، – دەيدى تالعات قالييەۆ.
ساياساتتانۋشىنىڭ پىكىرىنشە، پرەزيدەنتتىڭ اكىمدەرمەن كەزدەسۋى – جەرگىلىكتى باسقارۋ جۇيەسىن جەتىلدىرۋ ماقساتىنداعى ماڭىزدى قادام. اۋىل اكىمدەرىنىڭ جۇمىسى وڭ باعالانسا، اۋدان دەڭگەيىندەگى باسقارۋ مودەلى وزگەرۋى مۇمكىن.
Dalanews.kz الداعى ساياسي رەفورمالارعا قاتىستى اقپاراتتاردى نازاردا ۇستايدى.
توقايەۆ جيىندا نە دەدى؟
ايتا كەتەيىك، بۇعان دەيىن پرەزيدەنت قاسىم-جومارت توقايەۆ اۋىل اكىمدەرىنىڭ ديالوگ پلاتفورماسىندا ءسوز سويلەگەن ەدى.
مەملەكەت باسشىسى اۋدان اكىمىن سايلاۋدىڭ ءتيىمدى-تيىمسىز تۇستارىن مۇقيات سارالاۋدى تاپسىردى.
"اۋدان اكىمدەرىن سايلاۋعا قاتىستى ءارتۇرلى كوزقاراس بار. ءبىرقاتار قوعام قايراتكەرى مەن بەلسەندى ازاماتتار "اۋدان اكىمدەرىن سايلاۋ قاجەت پە، جوق پا" دەگەن ماسەلەنى قايتا قاراۋدى ۇسىنىپ وتىر. بۇل ماسەلەنى ەرلان سايروۆ، البەرت راۋ، مارحابات جايىمبەتوۆ باستاعان دەپۋتاتتار دا كوتەردى. ولار ەلدە سايلاۋ تىم كوبەيىپ بارا جاتقانىن، جۇرت ساياسي ناۋقانداردان مەزى بولا باستاعانىن ايتىپ وتىر. بۇل پىكىردى اۋىل جانە اۋدان تۇرعىندارى دا قولداپ جاتىر. سايلاۋ ناۋقاندارى جەرگىلىكتى جەردە جۇرگىزىلۋگە ءتيىس ناقتى جۇمىستارعا كەدەرگى كەلتىرۋى مۇمكىن دەگەن پايىمدار دا بار. بۇل پىكىرلەردى ەسكەرگەن ءجون"، - دەدى پرەزيدەنت.
بۇعان دەيىن اۋدان اكىمدەرىن سايلاۋ ءتاسىلى ارقىلى 52 اكىم سايلانعان.
"ەندى ولاردىڭ قالاي جۇمىس ىستەيتىنىن قاراپ كورۋ قاجەت. اۋدان اكىمىن سايلاۋدىڭ ءتيىمدى-تيىمسىز تۇستارىن مۇقيات سارالاۋ كەرەك. ماسەلە اۋدان اكىمدەرىنىڭ سايلاۋىن مىندەتتى تۇردە وتكىزۋ ەمەس، باستى ماقسات: ءبىز وڭ ناتيجەلەرگە قول جەتكىزۋىمىز كەرەك. ۇكىمەت جانە پارلامەنت دەپۋتاتتارى بىرلەسىپ، وسى ماسەلەنى جان-جاقتى قاراپ، ادىلەتتى، دۇرىس شەشىم قابىلداۋى قاجەت. ەڭ باستىسى، ءاربىر رەفورما سالماقتى كوزقاراسپەن، بايىپپەن جاسالۋى كەرەك"، - دەدى توقايەۆ.
