"Ábliazovtyń aitaǵymen alańǵa shyqqan boikotshylar meniń meilinshe mol daýys jinaýyma keri áser etti" dep esepteidi Qosanov.
Onyń ústine bir kezdegi oppozitsiia sapyndaǵy úzeńgi-joldastar da osy sailaýda kúrt qubylyp Qosanovqa qarsy jumys istegen.
"Men bilikke jete almadym, oilaǵanym oryndalǵan joq, taq maǵan tiesili bolýǵa tiis edi" dep eldi dúrliktirip, erteń halyq kóshege shyǵyp, politsiia olardy uryp soǵyp, jazyqsyz jurttyń qany tógilgennen góri osyndai azamattyq sheshim qabyldaiyn degen uiǵarymǵa keldim.
Boikotshylardyń jóni bir bólek. Olardy alǵan betinen qaitara almaisyń.
Al biraq maǵan daýys bergen buqaranyń kózi shyǵyp, basy jarylyp, politsiianyń páýeskesine tielip ketkenin qalaǵam joq.
Budan buryn da "biz quqyqtyq jolmen júremiz" dep áldeneshe ret aitqanmyn.
Iá, men sondai sheshim qabyldadym. Munyń arjaǵynda bir úlken faktor bar.
Kezinde radikaldy oppozitsiianyń quramynda bolǵan qazaqpyn. Bilik ruqsat bermese, jurtty alańǵa alyp shyqqan qazaqpyz biz.
2011 jylǵy qandy qyrǵynda Jańaózenge bardyq. Qalaǵa kirgizgen joq. Jetibaidan qaitardy. Aqtaýǵa keldik. Aýrýhanadaǵy jaraqat alǵan azamattardyń kóńilin suradyq. Sol kezgi sát álige deiin kóz aldymda.
Jaraqat alǵan jap-jas jigitti aiaǵynan atypty. Suhbattasyp otyrǵanda bylai dedi:
"Aǵa, anam basyn kótere almai syrqattanyp jatqan. "Balam, alań jaq azan-qazan bolyp ketti, dárige barmai-aq qoi" degenine qaramai dárihanaǵa júgire jónelgen edim. Dárimdi alyp keri qaitqan kezde aiaǵymnan atty...
Aǵa, bilikten dámesi barlar talasa bersin. Sharýam da, shataǵym da joq. Al biraq meniń ne jazyǵym bar? Álgi qańǵyǵan oq aiaqqa emes, keýdeme tusyma tise artymdaǵy anam ańyrap qalar edi ǵoi...".
Sol kez, sol sát meniń bul bilikti ózgertýge qatysty ustynymdy kúrt ózgertti. Sol kez, sol sátten bastap bul júiemen quqyqtyq jolmen kúresýge kóshtim...", – deidi Ámirjan Qosanov.
Daiyndaǵan, Dýman BYQAI
Videosuhbattyń tolyq nusqasyn osy aradan kóre alasyz:
https://youtu.be/oIOI0XWD740
