Eski Qazaqstan sý tasqynyn paidalanyp bilikke kelmek. Bul týraly Májilis depýtaty Erlan Sairov aitty. Depýtattyń sózinshe, qazirgi tańda prezident Toqaevty aqparattyq deńgeide diskreditatsiialaý júrip jatyr, - dep habarlaidy Dalanews.kz.
Depýtattyń sózinshe, eldegi revanshistik kúshter elge túsken árbir aýyrtpalyqty paidalanyp, qazirgi prezidentti jamandaýǵa daiyn otyrady.
"Prezident Toqaev QR konstitýtsiiasy boiynsha Qazaqstan Respýblikasynyń legitimdi prezidenti. Keibir syn aitýshylar - syn aityp otyrǵan joq. Olar bizdiń elimizde saiasi destabilizatsiia jasaýǵa tyrysyp otyr. Olar revanshistik kúshterge kerek. Al olar qiyn-qystaý zamandy paidalanyp, qaitadan bilikke kelýge tyrysyp otyr. Revanshistik kúshter degen kim? Olar burynǵy memleket basshysynyń ainalasynda júrip, baiyp alǵan, qaltasyn toltyryp alǵan, halyqtyń búkil aqshasyn jep úirengen", - deidi depýtat Abay live YouTube-arnasyna bergen suhbatynda.
Sairovtyń sózinshe, olardyń jospary boiynsha qazirgi tańda prezidentti aqparattyq deńgeide deskreditatsiialaý bolyp jatyr.
"Sonymen qatar, "Shal, kel" degen neshe túrli chellendj bolyp jatyr. Munyń bári uiymdasqan túrde bolyp jatyr. Bul syn emes, memleketke qaýip tónip turǵan kezde memlekettiń ishine iritki salý", - deidi depýtat.
Aita keteiik, buǵan deiin Eski Qazaqstan eks-prezidenttiń úgit-nasihatyn kúsheite bastaǵanyn jazǵan edik. Áleýmettik jelide Eski Qazaqstandy jaqtaýshylar belsendi bola bastaǵan.
Eski Qazaqstandy jaqtaýshylar ásirese TikTok-ta belsendi jumys júrgize bastaǵan. Jelide taraǵan videolardyń mazmuny bir sarynda – Nazarbaev bilikte otyrǵan kezde halyqtyń jaǵdaiy jaqsy bolypty-mys.
Paraqshalarda Nazarbaevtyń halyqqa jaqsy kórinip qalǵan tustaryn, sheneýnikterdi sógip jatqan sátterin kórsetip, adamdarǵa psihologiialyq turǵyda áser etetin videolardy jariialai bastaǵan.
Sondai paraqshalardyń biri – «Elbasy Nazarbaev» dep atalǵan TikTok arna. Paraqshada qazirgi ýaqytta 98 myńǵa jýyq oqyrman bar. Videolar milliondap qaralym jinap úlgergen.
Paraqshadaǵy videolardyń birinde «halyq Nazarbaevqa shúkirshilik jasai almaǵany» aitylady.
«Qara sýmen júrgen halyqty balǵa jetkizip edi! Baryńdy baǵalai almadyńdar. Endi jarqyrap ómir súrgenderińdi kóreiik! Elbasym, seniń qadirińdi túsinbegen halyqtan ketkeniń de durys bolǵan-aý!», - deidi video avtory.
Bul videoǵa jazylǵan pikirler – «bottar armiiasynyń» jumysy tárizdi.
«Tek Qazaqstannyń emes, Álemniń kóshbasshysy»
«Atamyz qaityp kelse, eshkimnen qoryqpai ómir súremiz»
«Aman bolsyn, kóregen edi, báriniń aldyn alyp otyratyn edi» - degen syńaidaǵy pikirler kóptep jazylǵan.
Jýrnalist Syrym Itqulovtyń sózinshe, Arystaǵy jarylys, shahtalardaǵy jarylys, Qańtar oqiǵasy sekildi aldymyzdan shyqqan problemalar áleýmettik ekonomikalyq turǵydan da, ideologiialyq turǵydan da quldyraý ekenin kórsetip otyr.
«Bul sol jumystardyń jemisi (naqty aitqanda jumys atqarylmaýynyń) – búgin aiaq asty saǵyna qalǵan, eldi 25 jyl basqarǵan biliktiń jumysy. (...) Qazirgi problemalardyń kontekstine qarasaq, olardyń sebebi de belgili: 30 jylda birde-bir damba salynbaǵan, TKSh men infraqurylymǵa investitsiia salynbaǵan», - deidi jýrnalist telegram arnasynda.
Odan bólek, «Elbasy ketkeli halyqtyń jaǵdaiy nasharlap ketken» degen mazmundaǵy video paida bolǵan. Munda da jazylǵan pikirler bottardyń jumysyna uqsaidy.
Sonymen qatar, buǵan deiin Sairov Nazarbaev áýletiniń sońyna túskenin jazǵan edik.
