ەسكى قازاقستان سۋ تاسقىنىن پايدالانىپ بيلىككە كەلمەك. بۇل تۋرالى ءماجىلىس دەپۋتاتى ەرلان سايروۆ ايتتى. دەپۋتاتتىڭ سوزىنشە، قازىرگى تاڭدا پرەزيدەنت توقايەۆتى اقپاراتتىق دەڭگەيدە ديسكرەديتاسيالاۋ ءجۇرىپ جاتىر، - دەپ حابارلايدى Dalanews.kz.
دەپۋتاتتىڭ سوزىنشە، ەلدەگى ريەۆانشيستىك كۇشتەر ەلگە تۇسكەن ءاربىر اۋىرتپالىقتى پايدالانىپ، قازىرگى پرەزيدەنتتى جامانداۋعا دايىن وتىرادى.
"پرەزيدەنت توقايەۆ ق ر كونستيتۋسياسى بويىنشا قازاقستان رەسپۋبليكاسىنىڭ لەگيتيمدى پرەزيدەنتى. كەيبىر سىن ايتۋشىلار - سىن ايتىپ وتىرعان جوق. ولار ءبىزدىڭ ەلىمىزدە ساياسي دەستابيليزاسيا جاساۋعا تىرىسىپ وتىر. ولار ريەۆانشيستىك كۇشتەرگە كەرەك. ال ولار قيىن-قىستاۋ زاماندى پايدالانىپ، قايتادان بيلىككە كەلۋگە تىرىسىپ وتىر. ريەۆانشيستىك كۇشتەر دەگەن كىم؟ ولار بۇرىنعى مەملەكەت باسشىسىنىڭ اينالاسىندا ءجۇرىپ، بايىپ العان، قالتاسىن تولتىرىپ العان، حالىقتىڭ بۇكىل اقشاسىن جەپ ۇيرەنگەن"، - دەيدى دەپۋتات Abay live YouTube-ارناسىنا بەرگەن سۇحباتىندا.
سايروۆتىڭ سوزىنشە، ولاردىڭ جوسپارى بويىنشا قازىرگى تاڭدا پرەزيدەنتتى اقپاراتتىق دەڭگەيدە دەسكرەديتاسيالاۋ بولىپ جاتىر.
"سونىمەن قاتار، "شال، كەل" دەگەن نەشە ءتۇرلى چەللەندج بولىپ جاتىر. مۇنىڭ ءبارى ۇيىمداسقان تۇردە بولىپ جاتىر. بۇل سىن ەمەس، مەملەكەتكە ءقاۋىپ ءتونىپ تۇرعان كەزدە مەملەكەتتىڭ ىشىنە ىرىتكى سالۋ"، - دەيدى دەپۋتات.
ايتا كەتەيىك، بۇعان دەيىن ەسكى قازاقستان ەكس-پرەزيدەنتتىڭ ۇگىت-ناسيحاتىن كۇشەيتە باستاعانىن جازعان ەدىك. الەۋمەتتىك جەلىدە ەسكى قازاقستاندى جاقتاۋشىلار بەلسەندى بولا باستاعان.
ەسكى قازاقستاندى جاقتاۋشىلار اسىرەسە TikTok-تا بەلسەندى جۇمىس جۇرگىزە باستاعان. جەلىدە تاراعان ۆيدەولاردىڭ مازمۇنى ءبىر سارىندا – نازاربايەۆ بيلىكتە وتىرعان كەزدە حالىقتىڭ جاعدايى جاقسى بولىپتى-مىس.
پاراقشالاردا نازاربايەۆتىڭ حالىققا جاقسى كورىنىپ قالعان تۇستارىن، شەنەۋنىكتەردى سوگىپ جاتقان ساتتەرىن كورسەتىپ، ادامدارعا پسيحولوگيالىق تۇرعىدا اسەر ەتەتىن ۆيدەولاردى جاريالاي باستاعان.
سونداي پاراقشالاردىڭ ءبىرى – «ەلباسى نازاربايەۆ» دەپ اتالعان TikTok ارنا. پاراقشادا قازىرگى ۋاقىتتا 98 مىڭعا جۋىق وقىرمان بار. ۆيدەولار ميلليونداپ قارالىم جيناپ ۇلگەرگەن.
پاراقشاداعى ۆيدەولاردىڭ بىرىندە «حالىق نازاربايەۆقا شۇكىرشىلىك جاساي الماعانى» ايتىلادى.
«قارا سۋمەن جۇرگەن حالىقتى بالعا جەتكىزىپ ەدى! بارىڭدى باعالاي المادىڭدار. ەندى جارقىراپ ءومىر سۇرگەندەرىڭدى كورەيىك! ەلباسىم، سەنىڭ ءقادىرىڭدى تۇسىنبەگەن حالىقتان كەتكەنىڭ دە دۇرىس بولعان-اۋ!»، - دەيدى ۆيدەو اۆتورى.
بۇل ۆيدەوعا جازىلعان پىكىرلەر – «بوتتار ارمياسىنىڭ» جۇمىسى ءتارىزدى.
«تەك قازاقستاننىڭ ەمەس، الەمنىڭ كوشباسشىسى»
«اتامىز قايتىپ كەلسە، ەشكىمنەن قورىقپاي ءومىر سۇرەمىز»
«امان بولسىن، كورەگەن ەدى، ءبارىنىڭ الدىن الىپ وتىراتىن ەدى» - دەگەن سىڭايداعى پىكىرلەر كوپتەپ جازىلعان.
جۋرناليست سىرىم يتقۇلوۆتىڭ سوزىنشە، ارىستاعى جارىلىس، شاحتالارداعى جارىلىس، قاڭتار وقيعاسى سەكىلدى الدىمىزدان شىققان پروبلەمالار الەۋمەتتىك ەكونوميكالىق تۇرعىدان دا، يدەولوگيالىق تۇرعىدان دا قۇلدىراۋ ەكەنىن كورسەتىپ وتىر.
«بۇل سول جۇمىستاردىڭ جەمىسى (ناقتى ايتقاندا جۇمىس اتقارىلماۋىنىڭ) – بۇگىن اياق استى ساعىنا قالعان، ەلدى 25 جىل باسقارعان بيلىكتىڭ جۇمىسى. (...) قازىرگى پروبلەمالاردىڭ كونتەكستىنە قاراساق، ولاردىڭ سەبەبى دە بەلگىلى: 30 جىلدا بىردە-بىر دامبا سالىنباعان، تكش مەن ينفراقۇرىلىمعا ينۆەستيسيا سالىنباعان»، - دەيدى جۋرناليست تەلەگرام ارناسىندا.
ودان بولەك، «ەلباسى كەتكەلى حالىقتىڭ جاعدايى ناشارلاپ كەتكەن» دەگەن مازمۇنداعى ۆيدەو پايدا بولعان. مۇندا دا جازىلعان پىكىرلەر بوتتاردىڭ جۇمىسىنا ۇقسايدى.
سونىمەن قاتار، بۇعان دەيىن سايروۆ نازاربايەۆ اۋلەتىنىڭ سوڭىنا تۇسكەنىن جازعان ەدىك.
